– Dát lea ášši mii beroštahttá ollugiid, maiddái sámi servodagas. Mun háliidan ahte Sámediggi galgá ovddidit oasi dán áŋgiruššamis go mii sáddet gulaskuddancealkámuša, dadjá Myrnes Balto.

Sámediggeráđđi lea máŋgga oktavuođas dovddahan vuorjašumi daid váikkuhusaid ektui maid báikkálaš fálaldagaid heaittiheapmi buktá sámi guovlluide. Maŋimusat čoahkkimis Dearvvašvuođa- ja fuolahusministariin Ingvild Kjerkol njukčamánu 18. beaivvi.  

- Mii bivddiimet dearvvašvuođaministara suodjalit Deanu, Álttá ja Davvi-Romssa fálaldagaid. Sáhttet leat stuorra váikkuhusat go heaittihit dehálaš fálaldagaid sámi álbmogii. Dát lea dieđusge deaŧalaš vuođđu Sámedikki gulaskuddancealkámuššii, dasa lassin háliidit mii dadjat juoidá sámi spesialistadearvvašvuođabálvalusaid viidáset ovddidandárbbuid birra, dadjá ráđđelahttu Myrnes Balto.

– Jus háliidat buktit árvalusaid, de sáhtát váldit muinna njuolga oktavuođa, runar.myrnes.balto@samediggi.no,  dahje čállit Sámedikki poastavuostáváldimii samediggi@samediggi.no  Lea deaŧalaš ahte cealkámušat bohtet ovdal cuoŋománu 15. beaivvi, nu ahte mii joksat Davvi Dearvvašvuođa áigemeriid, loahpaha Myrnes Balto.