Sámediggi oaččui Luođi ruoktu – doaibmaplána geassemánus ovtta nammaduvvon bargojoavkkus mas lea relevánta fágalaš duogáš. Plána govvida movt luohtesuorggi sáhtášii nannet ja ovddidit boahttevaš jagiid, ja das lea ásahuslaš ruoktu luohtái guovddáš evttohussan. Sámedikki dievasčoahkkin galgá meannudit doaibmaplána maŋŋel gulaskuddamiid.
– Sámediggi lea guhká bargan nannet luođi sajádaga ja sihkkarastit buriid rámmaid vai luohteárbevieruid sáhttá ovddidit ja seailluhit. Okta guovddáš mihttu lea leamaš ásahit iešheanalaš sámi ásahusa luohtái, mii gáhtte, fievrreda, doarju ja ovddida luođi. Doaibmaplána addá midjiide dehálaš máhttovuođu ja láidestusaid viidáset bargui, dadjá sámediggeráđđi Paul Bendikk Jåma (NSR).
Bargojoavku ávžžuha ásahit iešheanalaš ásahusa mas lea sierra mandáhtta, sierra jođiheapmi ja ollislaš ovddasvástádus servodatdoibmii. Seammás deattuha bargojoavku ahte ásahus ii galgga váldit badjelasas daid birrasiid bargguid mat juo leat ealihan juoigama, muhto nannet sin ovttasbarggu ja veahkehit deavdit guoros sajiid mat dál ráššudit ollislašvuođa.
– Bargojoavku lea čielggas dainna ahte luođi ruoktu galgá leat čohkkejeaddji guovddáš olles luohtesuorgái. Ulbmil lea buoridit ovttasbarggu birrasiid gaskkas ja váikkuhit guhkesáigásaš bargui dokumenteremiin, máhttoovddidemiin, oahpahusain, vuoigatvuođaiguin ja gaskkustemiin, dadjá Jåma.
Plána luođi boahtteáigái
Bargojoavku čilge luođi eanet go musihkkan. Plána vuolggasadjin lea luođi dehálašvuohta sámi gielaid, kultuvrra ja identitehta seailluheaddjin, ja ahte lea dárbu eanet oktiiheivehuvvon áŋgiruššamii sihkkarastit ja ovddidit luođi boahtteáiggis.
Plána čilge makkár barggut ásahusas galggaše leat:
- sihkkarastit ja almmuhit historjjálaš luohtebáddemiid
- nannet juoiganmáhtu fievrredeami buolvvaid gaskkas mentorortnegiid bokte
- ovddidit oahpahan- ja oahppanresurssaid
- buoridit juigiid rámmaeavttuid
- ásahit luohteforuma
- ásahis fágalaš foruma musihkkapedagogaide
- ásahit stipeandaortnegiid juigiide
- ráhkadit sertifiserenortnega
- áimmahuššat sámi vuoigatvuođa ráđđet kulturárbbi ja immateriála vuoigatvuođaid
- ásahit nuvttá ráđđeaddinbálvalusa
- bargat hástalusaiguin mat gusket goanstajierbmái ja sámi kulturmateriála digitála geavaheapmái
Bovde viiddis gulaskuddamii
Sámediggi sihtá oaiviliid bargojoavkku doaibmaplánii, sihke bajimuš prinsihpaid birra ja konkrehta dan birra makkár sisdoallu dakkár ásahusas galggašii leat ja movt dan galggašii organiseret.
– Mii háliidivččiimet oažžut viiddis gulaskuddama ja olu oaiviliid. Dat attášii Sámedikki dievasčoahkkimii buori vuođu maŋŋel meannudit doaibmaplána ja árvvoštallat movt luođi boahtteáiggiin ain sáhtášii bargat, dadjá Jåma.
Dieđut:
Doaibmaplána lea ráhkadan bargojoavku mas leat Ánde Somby (Norgga árktalaš universitehta), Tanja Holmen (Norsk senter for folkemusikk og folkedans), Johan Vasara (Sámi arkiiva) ja Ol Johan Gaup (Sámi musihkkafestivála).
Doaibmaplána máhttovuođđun leat guokte raportta maid Sámediggi lea diŋgon. Daid logat dás:
Gulaskuddanáigemearri lea juovlamánu 15. beaivvi 2026.