Sámediggi bivdá eanet doarjaga njulget dáruiduhttima váikkuhusaidSámediggeráđđi ovddida cealkámuša stáhtabušehttii 2026, mas čujuhit ahte lea mearkkašahtti dárbu lasihit juolludusaid njulget daid ekonomalaš bonjuvuođaid mat leat čuožžilan dáruiduhttima geažil.– Lassi juolludusat leat mielde njulgemin dan eahperievtti maid dáruiduhttin dagahii. Mis lea earret eará dárbu nannet dálá ásahusaid, ja erenoamážit ásahit ođđa giella- ja kulturfálaldagaid go daidda lea dárbu, dadjá sámediggeráđđi Runar Myrnes Balto (NSR). Dievasčoahkkinášši árvalusas evttoha sámediggeráđđi 722,9 millijovnna ruvdnosaš juolluduslassáneami jahkái 2026, masa Sámediggái lea 292,2 millijovnna ruvdnosaš lasáhus. Sámediggeráđđi deattuha ahte sii fertejit ieža beassat mearridit masa geavahit juolluduslassáneami beassan dihte vuoruhit iežaset dárbbuid vuođul, ja sihkkarastit ceavzilis ovdáneami sámi servodahkii. – Nugo min oaidnu lea, de lea dát lasáhus muttolaš evttohus mii iešalddis ii boađe njulget boasttuvuođaid mat leat geavvan dáruiduhttima dihte. Mis ii leat oppalašgovva buot dárbbuin mat leat sámi servodagas, muhto dakkár lassáneapmi sáhttá addit lávkki rivttes guvlui, dadjá Runar Myrnes Balto.Váldovuoruheamit 2026:sSámediggi bidjá ovdán čuovvovaš váldovuorohemiid: Giella: 62,8 miljovnna ruvnno Oahppu: 29,6 miljovnna ruvnno Areála, biras ja dálkkádat: 16,5 miljovnna ruvnno Ealáhusat: 18 miljovnna ruvnno Kultuvra: 535,5 miljovnna ruvnno Kulturmuitosuodjaleapmi: 10,5 miljovnna ruvnno Dearvvašvuohta: 20 miljovnna ruvnno Hálddahus: 30 miljovnna ruvnno Evttohuvvon 722,9 millijovnna ruvdnosaš lassáneamis jahkái 2026 lea 430 millijovnna várrejuvvon ođđa visttiide RiddoDuottarMuseaid Kárášjogas ja Savio-museai. Almmuhuvvon 16.09.2024 12.02 Maŋemusat rievdaduvvon 16.09.2024 12.02