Mikkel Eskil Mikkelsen Åse M.P. Pulk/Sámediggi

Sámediggeráđđi ávžžuha KS boahtte bálkášiehtadusas loktet ja vuoruhit sámi oahpaheddjiid geat oahpahit sámegielas ja sámegillii. Sámediggi vuorjašuvvá sámi skuvlla boahtteáiggi geažil, ja lea buktán cealkámuša šiehtadallat erenoamážit sámegieloahpaheddjiid bálká- ja bargoeavttuid.

– Norggas lea heahtedilli unnán sámi oahpaheddjiid geažil. Leat unnán oahpaheaddjit mat oahpahit sámegielas ja sámegillii skuvllain ja mánáidgárddiin, ja sámegieloahpaheddjiid bálká- ja bargoeavttut leat danne dehálaččat go galgá rekruteret ođđa ja doalahit hárjánan sámegieloahpaheddjiid virggis, dadjá Mikkelsen.

Unna oahpaheaddjijovkkoš geain lea golmmageardánis gelbbolašvuohta

Lea unna oahpaheaddjijovkkoš man birra Sámediggi buktá cealkámuša, čilge Mikkelsen.

– Leat ovdamearkka dihte 226 oahpaheaddji geat oahpahit sámegielas ja sámegillii vuođđoskuvllas skuvlajagis 2021-2023. Sámediggi oaivvilda ahte go lea dan meare unna jovkkoš mas lea áibbas dárbbašlaš ja ohcaluvvon gelbbolašvuohta servodagas, de galggašii leat vejolaš erenoamážit vuoruhit sámegieloahpaheddjiid. Dat lea erenoamáš dehálaš go jurddaša ahte sis lea golmmageardánis gelbbolašvuohta mas fága, giella ja kultuvra lea oassin, dadjá Mikkelsen.

Bargoeavttut bálkášiehtadallamiid lassin

Sámediggeráđđi bivdá KS šiehtadallat erenoamážit oahpaheddjiid bargoáiggiid. Mikkelsen čujuha dasa ahte sámegieloahpaheddjiin leat smávva fágabirrasat ja sii fertejit buvttadit oahpponeavvuid iežaset atnui.

– Sámi oahpaheddjiid ollislaš dili geažil, mas vásihit alla bargonoađi, mas unna fágabirrasaččat ja dárbu oažžut eanet oahpaheddjiid geat oahpahit sámegielas ja sámegillii, de rávvet mii KS geahčadit iežaset bargoáigešiehtadusaid, main oahpaheaddjit geat oahpahit sámegielas ja sámegillii maid berrešedje oažžut vuoliduvvot lohkangeatnegasvuođa váilevaš sámi oahpponeavvuid geažil. Ollislaš govva čájeha ahte sámegieloahpaheddjiin dávjá lea losit árgabeaivi go sin bargoustibiin, dadjá Mikkelsen.

Heahtedilli unnán oahpaheddjiid dihte

Oahpaheaddjiváilevašvuohta lea duođalaš, deattuha sámediggeráđđi iežas cealkámušas. Ollu raporttat čujuhit váilevašvuhtii miehtá riikka. Sámediggi ja ráđđehus leat ovttasbargan stuoradiggedieđáhusa oktavuođas mii lea sámegieloahpaheddjiid rekruterema birra mánáidgárddiide ja skuvllaide.

– Mii eat čoavdde oahpaheaddjiváilevašvuođa dušše bálkkáiguin. Danne lea Sámedikkis ja ráđđehusas leamaš gulahallan boahttevaš stuoradiggedieđáhusa birra, mii jagis 2023 gieđahallá fáttáid gelbbolašvuohta ja rekrutteren mánáidgárddis, vuođđooahpahusas ja alit oahpus. Sámedikkis leat alla vuordámušat dasa ahte stuoradiggedieđáhus veahkeha oažžut eanet fokusa doaibmabijuide mat rekruterejit oahpaheddjiid geain lea sámegielgelbbolašvuohta boahttevaš jagiin, dadjá Mikkelsen.

Gažaldagaid vástida dahje jearahallama addá sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no