Sámediggi lágida suorgedeaivvadeami boazoealáhussii Scandic Hoteallas Kárášjogas. Ulbmil lea ásahit ságastallama, vásáhuslonohallama ja fágalaš čiekŋudeami arena ealáhusa golmma áigeguovdilis fáttáide: boraspiregažaldagaide, sihkkarvuhtii ja gearggusvuhtii ja veahkaválddálašvuhtii ja illastemiide boazodoalus. 

Boazodoallu resursan ráfehis máilmmis

Otnáš geopolitihkalaš dilis lea sihkkarvuohta ja gearggusvuohta šaddan áigeguovdilin eambbo go ovdal. Konferánsa galgá suokkardit makkár rolla boazodoalus lea nationála gearggusvuođas ja borramušsihkkarvuođas, ja makkár hástalusat leat go Suodjalus doaimmat lassánit sámis. 

Nils Ánte Oskal Eira Árvu/Sámediggi

– Badjeolbmot bohtet juogadit sin persovnnalaš vásáhusaid ovttasdoaimmas militearain, dadjá politihkalaš ráđđeaddi Nils Ánte Eira (NSR).

Boraspirepolitihkka galgá maid vuđolaččat guorahallojuvvot ođđa čielggadusas maid juridihkalaš áššedovdilávdegoddi lea čállán. Čielggadeapmi váldá ovdan Norgga álbmotrievttálaš geatnegasvuođaid boraspirehálddašeami ja boazodoalu oktavuođas. 

Sihke Sámediggi ja Norgga Boazosápmelaččaid Riikasearvi (NBR) ovddidit oainnuideaset ovdal go joavkobargu álggahuvvo. 

Guhkiduvvon dieđihanáigemearri

Sihkkarastin dihte ahte eambbosat servet, lea Sámediggi ráhpan vejolašvuođa ahte juohke siida dahje orohat sáhttá sáddet eanet go ovtta ovddasteaddji. Sámediggi gokčá mátke- ja orrungoluid ovtta ovddasteaddji ovddas juohke orohagas dárbbu mielde.

Ođđa dieđihanáigemearri lea miessemánu 15. beaivvi. 

– Mii ávžžuhat buohkain geain lea gullevašvuohta ealáhussii, dieđihit konferánsii. Ahte olus servet lea hui mearrideaddjin vai digaštallamat šaddet nu relevánta ja deaivilat go vejolaš, dadjá politihkalaš ráđđeaddi Nils Ánte Eira. 

Historjjálaš raporta veahkaválddi ja illasteami birra

VEAHKA-raportta almmuheapmi lea okta dain váldofáttáin konferánssas, maid Nationála gealboguovddáš veahkaválddálašvuođa ja traumáhtalaš streassa ektui (NKVTS) lea ráhkadan. Raporta lea guorahallanprošeakta gos veahkaválddálašvuohta ja illastemiid viidodaga boazosápmelaččaid birrasis. 

Guorahallan váldá vuolggasaji badjeolbmuid iežaset muitalusain ja geahčada mo historjjálaš traumat, dáruiduhttinpolitihkka ja otnáš olgguldas deaddu, nu go areálasisabahkkemat, čuhcet oktavuođaide boazodoalus. 

Silje Karine Muotka Árvu/Sámediggi

– Badjeolbmot vásihit dál stuorra ja garra deattu. Dát raporta addá dárbbašlaš ja dárkilis gova das mo noađit stuorra servodagas čuhcet boazoealáhusa árgabeaivái, lohká sámediggepresideanta Silje Karine Muotka (NSR).

Presideanta čujuha ahte máhttu lea mearrideaddji heivehan dihte ja nannet doaibmabijuid doppe gos dat eanemusat dárbbašuvvojit.

Prográmma ja eambbo dieđuid gávnnat dáppe.