Mii sávvat mediaide bures boahtima Sámediggái lávdegodde- ja dievasčoahkkimiidda. Dievasčoahkkima oktavuođas leat maid muhtun čoahkkimat ja guossit mat sáhttet leat miellagiddevaččat mediai. 

Loga dáppe buot áššiid maid dievasčoahkkin galgá meannudit.  

Dáppe geahčat dievasčoahkkima mii sáddejuvvo njuolgga Sámedikki neahtta-TV bokte. 

Maŋŋebárga čakčamánu 26. beaivvi:

• Sámediggeráđđi Runar Myrnes Balto čoahkkinasttá Emma Rawson-Te Patuin dii. 11.00 Sámedikkis.
  
  Emma Rawson-Te Patu lea ManuKahu Associates direktevra, Indigenous Consultancy Āotearoas Ođđa Zealánddas, ja lea Public Health Equity Lead Whakauae Research Services. Son lea maid World Federation of Public Health Associations (WFPHA) válljejuvvon presideanta ja Indigenous Working Group (WFPHA) mieljođiheaddji. 
   

  Čoahkkima fáddá lea álgoálbmogat ja dearvvašvuohta. Emma Rawson-Te Patu čuovvu maid dievasčoahkkima gaskavahku.

  Gulahallanolmmoš: Ossodathoavda Lisbeth Vesterheim Skoglund, tel: 99 32 07 16

Gaskavahku čakčamánu 27. beaivvi:

• Australia ambassadevra Islánddas, Dánmárkkus ja Norggas, H.E. Kerin Ann Ayyaterju, galleda Sámedikki. Dievasčoahkkinjođiheaddji Tom Sottinen (Bb) váldá vuostá Australia ambassádevrra go galleda dievasčoahkkima mii álgá diibmu 09.00. Dievasčoahkkima galledeami oktavuođas beassá H.E. Kerin Ann Ayyalaraju maiddái oahpásnuvvat eanet Sámedikki ja parlameantta doaimmaide.  
  
  Ambassadevra deaivvada maiddái Sámedikki presideanttain Silje Karine Muotkain (NSR) ja muhtun oasi sámediggeráđiin dii. 14.00. Ambassadevra galledeami duogáš lea su sávaldat oahpásnuvvat Sámedikkiin ja sámi demokratiijain. Golggotmánu 14. beaivvi galgá Austrálias leat álbmotjienasteapmi man áigumuš lea dohkkehit álgoálbmogiid vuođđolága. 
  
  Vuođđoláhkaevttohus addá earret eará aborigiinnaide ja Torresstredet-čerdii ovtta jiena riikkačoahkkimii mii galgá addit eiseválddiide ráđiid áššiin mat gusket Australia álgoálbmogiidda.
  
  Gulahallanolmmoš: Riikkaidgaskasaš áššiid juhkosa hoavda, Jon Petter Gintal, tel: 99 77 48 48.
   
• Sámediggeráđđi Mikkel Eskil Mikkelsen (NSR) deaivvada iešguđet sámi servviiguin ja organisašuvnnaiguin čoahkkimis Kárášjogas dii. 13.00-14-00. Searvvit mat galledit Sámedikki leat Mearrasámi siida, Min árbe, orrõs-Nuortalašsápmelaččat ja Davvebiegga álbmot.  
  
  Čoahkkima fáttát leat Sámedikki giellastrategiija – Giellaloktema revideren, Sámediggi bivdá cealkámuša giellastrategiijaid revideremii, organisašuvnnaid/servviid stáhtus, oanehaččat dieđut Sámedikki doarjjaortnegiid birra. Dasa lassin šaddá ofelastin Sámedikkis.
  
  Gulahallanolmmoš: Seniorráđđeaddi giellaossodagas, Anne Marit Triumf, tlf: 78 48 42 11.
   
• Seto-álbmoga delegašuvdna Esteeatnamis galleda Sámedikki. Suoma-ugralaš delegašuvdna mas leat 25 olbmo leat oahppomátkkis Sámis ja galledit dan oktavuođas Sámedikki. Delegášuvnnas leat áirasat Setomaa gielddas, museain, iešguđetlágan servviin, oahpaheddjiin, nuorain jna., geain buohkain lea beroštupmi seailluhit ja ovddidit Seto-giela ja kultuvrra. 
  
  Sin ulbmil galledemiin Sámis lea lonohallat vásáhusaid ja máhtu giellaprográmmaid, politihka, sierralágan prošeavttaid ja doaimmaid birra mat čatnasit sámi kultuvrra áimmahuššamii. Sámedikki giellaossodat váldá vuostá delegašuvnna. 
  
  Gulahallanolmmoš: Giellaossodaga ossodatdirektevra, Risten Turi Aleksandersen, tlf: 78 47 40 09.