Sámediggi galgá doallat gulaskuddamiid ja álbmotčoahkkimiid buot válgabiriin oassin Duohtavuođa- ja soabahankommišuvnna raportta regionála čuovvoleamis. Vuosttaš gulaskuddan- ja álbmotčoahkkinvuorru čađahuvvui Davveguovllu válgabiirres mannan giđa, ja nubbi fas Lullisámi válgabiirres diimmá čavčča. 

Dál lea Nuortaguovllu válgabiire vuorru. Válgabiirii gullet gielddat Mátta-Várjjat, Unjárga, Čáhcesuolu, Várggát, Báhcavuotna, Deatnu, Bearalváhki, Davvesiida ja Gáŋgaviika.

Silje Karine Muotka Ørjan Marakatt Bertelsen

Lea gulaskuddan olles válgabiirres, ja rabas álbmotčoahkkimat Deanus, Gilevuonas, Čáhcesullos ja Girkonjárggas. Sámediggepresideanta Silje Karine Muotka (NSR) ja sámediggeráđđi Jon-Christer Mudenia (NSR) oassálastiba buot čoahkkimiin.

– Mii leat válljen lágidit álbmotčoahkkimiid viidát Nuortaguovllu válgabiirres, juste dan dihte go válgabiire lea viiddis. Midjiide lea dehálaš deattuhit ahte dát gulaskuddan guoská olles válgabiirii, maiddái daidda gielddaide gos eai lágiduvvo álbmotčoahkkimat. Mun sávan danne ahte olbmot miehtá válgabiire geavahit liibba searvat, ávžžuha sámediggepresideanta Silje Karine Muotka.

Gulaskuddan ja álbmotčoahkkimat seamma áiggis

Álbmotčoahkkimat leat rahpasat buohkaide, ja čađahuvvojit oktanaga čálalaš gulaskuddamiin.

Presideanta sávvá ahte olbmot sihke servet álbmotčoahkkimiidda ja sáddejit čálalaš cealkámušaid.

– Dáruiduhttin lea čuohcan sámi servodagaide iešguđet ládje, ja danne ferte maid divodeapmi dahkkojuvvot báikkálaččat ja regionálalaččat. Gulaskuddamiid ja álbmotčoahkkimiid bokte háliidit mii gullat daid iešguđetlágan vásáhusaid ja dárbbuid mat leat Nuortaguovllu válgabiirres. Ii gávdno okta čoavddus mii heive buohkaide, ja mii dárbbašit din jienaid vai mii sáhttit dahkat dán buori vuogi mielde, dadjá Muotka.

Čálalaš gulaskuddama áigemearri lea cuoŋománu 7. b. 2026.

Dás sáhtát sáddet gulaskuddancealkámuša

Dása háliida Sámediggi vástádusa

Sámediggi dáhttu oaiviliid das makkár dárbbut sámi báikkálaš servodagain ja ovttaskas olbmuin leat dan dáfus mii sáhtášii divvut dáruiduhttima váikkuhusaid. Lea maid deaŧalaš čuvget maid báikkálaš sámi aktevrrat ieža sáhttet dahkat, movt gielddat, Norgga ásahusat ja organisašuvnnat sáhttet searvat bargui, ja makkár doaibmabijuid Sámediggi berre ordnet. Dasa lassin dáhttut mii gullat lea go dárbu rievdadit dahje nannet Sámedikki doarjjaortnegiid. 

Sámediggi ávžžuha buohkaid geain leat vásáhusat, dárbbut dahje evttohusat searvat prosessii. Gulaskuddan Nuortaguovllu válgabiirres lea okta máŋgga gulaskuddamis. Boahttevaš jagiid galget sullasaš gulaskuddamat dollojuvvot buot Sámedikki válgabiirriin.

Álbmotčoahkkimiid áigi ja báiki:

• Deatnu: Mánnodaga njukčamánu 23. beaivvi dii. 18.00-20.00, Galleri Martin, Rådhusveien 32, 9845 Tana Bru
• Gilevuotna: Maŋŋebárgga njukčamánu 24. beaivvi dii. 18.00-20.00, Gilevuona álbmotgirjerádjosis, Strandveien 152, 9790 Kjøllefjord   
• Čáhcesuolu: Gaskavahku njukčamánu 25. beaivvi dii. 18.00-20.00, Čáhcesullo girjerádjosis, Strandgt. 21, 9800 Vadsø  
• Girkonjárga: Duorastaga njukčamánu 26. beaivvi dii. 18.00-20.00, Thon Hotel Kirkenes, Johan Knudtzens gate 11, 9900 Kirkenes