– Sámediggeráđđi háliida váikkuhit dasa ahte unnidit stigmatiserema, botket tabuid ja lasihit dihtomielalašvuođa ja máhtu iešsorbmema birra. Mii háliidit bidjat fokusa dasa ahte iešsorbmen lea stuora servodatváttisvuohta, maiddái dáppe Sámis, dadjá sámediggeráđđi Runar Myrnes Balto (NSR).

Čalmmustahttima oktavuođas doallá sámediggeráđđi Runar Myrnes Balto apealla, ja mii cegget giitevašvuođamuoraid masa guossit besset heaŋgut lihpuid masa leat čállán juoidá man dihte sii leat giitevaččat. Mii maiddái cahkkehit gintaliid muitun sidjiide geat leat guođđán min ja midjiide servodahkan.

Guossit ávžžuhuvvojit coggat ala, dahje buktit mielde juoidá mas lea oránša ivdni, mii lea almmolaš ivdni mii geavahuvvo beaivvi čalmmustahttimii. Govat beaivvis juogaduvvojit Sámedikki sosiála mediain riikkaviidosaš kampánnja oktavuođas #mittlys, mii čalmmustahttá Iešsorbmeneastadeami máilmmibeaivvi sosiála mediain. 

Sámediggi lea maid bovden Sámi joatkkaskuvlla Kárášjogas oassálastit čalmmusteamis.

Rabas čalmmusteapmi lea dii. 10.00 rájes dii. 11.00 rádjái. Bures boahtin!

Ávžžuha eambbogiid čalmmustahttit beaivvi

Sámediggi áigu leat mielde eastadeamen iešsorbmema ja movt min sámi servodat sáhttá ovttas dustet dán lágan álbmotdearvvašvuođa váttisvuođaid. Danne čalmmustahttojuvvo beaivi siskkáldasat buot Sámedikki kánturbáikkiin fágalaš sisdoaluin fáttá birra.

Mii ávžžuhit maiddái eará sámi ásahusaid váldit oktavuođa Sámedikkiin vai mii sáhttit ovttasbargat sullasaš fágawebinára lágideamis.