Runar Myrnes Balto

– Das rájes go dát mearriduvvui dievasčoahkkimis, de leat mii bargan proseassa čađahemiiguin. Lea leamaš hástaleaddjin goappaš servviid oažžut álgoságastallamiidda. Sámedikkis leat leamaš šiehtadallamat duodješiehtadallamiid rámmain ja váldo  oasit dan ovddit šiehtadusas leat mielde, dadjá sámediggeráđđi Runar Myrnes Balto (NSR) geas lea gaskaboddosaččat ovddasvástádus duodjeáššiin, daningo sámediggeráđđi Hans Ole Eira (Gb) lea dieđihuvvon buohccin.

Dasto dál sáhttá álgit dábálaš duodješiehtadallamiiguin, mat gusket jagi 2024 ja 2025 strategiija- ja doaibmabidjošiehtadallamiidda. Sámediggi, Sámiid Duodji ja Duojáriid Ealáhussearvi álggahit duodješiehtadallamiid miessemánu 4. beaivvi Kárášjogas.

– Dál mii bovdet Duojáriid Ealáhussearvvi ja Sámiid Duoji dábálaš duodješiehtadallamiidda mat álget miessemánu 4. beaivvi. Goappaš servviin leat dieđihan ahte servet, ja dat lea buorre. Lean movttet go mii leat geargan álgoproseassaiguin, ja go mis dál leat rámmat, dadjá Myrnes Balto.

Duodjeregisttar heaittihuvvo jagi 2024 rájes, ja dan dihte Sámediggi ja Sámiid Duodji leat ealáhusšiehtadusa vuosttaš oasi šiehtadallamiin soahpan ahte doaibmadoarjjaortnega ohccit galget leat sertifiserejuvvon ođasmahtton Sámi Duodji-mearkkain ođđajagimánu 1. beaivvi 2024 rájes.

Sámiráđđi eaiggáduššá Sámi Duodji -mearkka, muhto sámi duodjeorganisašuvnnat hálddašit ja juhket dan. Duodjeinstituhtta meannuda duodjemearkaohcamiid Sámiráđi ovddas Norggas.

–  Go bidjat Sámi Duodji -mearkka gáibádussan doaibmadoarjjaohcamiid oktavuođas, de čájehit ahte Sámediggi doarju árbevirolaš sámi duoji ovdánahttima. Árbevirolaš sámi duodji lea áddjás bargu ja dat mearkkaša ahte dan ádjána guhká buvttadit.

Lea dehálaš ahte mis leat ortnegat mat váikkuhit dasa ahte olbmuin sáhttá leat árbevirolaš duodji ealáhussan, dadjá Myrnes Balto.

Sámediggi maid deattuha ahte duojáriidda galgá leat álki atnit ortnega.

– Mii áigut dál nu heivehit ahte dát šaddá álkibut juohke duojárii. Dan sáhttá gohčodit byråkratiserema unnideapmin. Ovdal leat fitnodagat dohkkehuvvon buktagiid dásis, muhto dál dohkkehuvvo olles fitnodat. Loahpa loahpas jáhkán ahte šaddá mihá álkibut atnit doaibmadoarjjaortnega, dadjá Myrnes Balto.

Jagi 2023 duodjeealáhusšiehtadusas leat doaibmadoarjjaortnega lassin máŋga eará doarjjaortnega, main buot duodjefitnodagat sáhttet ohcat doarjaga. Sáhttá namuhit ahte gávdnojit doarjjaortnegat mat gusket investeremiidda, ovddidandoaibmabijuide, konsuleantaveahkkái, oktasaš duodjebargobájiide, álggahandoarjagiidda, márkanfievrrideapmái ja márkanheiveheapmái.

Sámediggeráđđi ávžžuha eambbogiid atnit dáid ortnegiid.

– Mii ávžžuhit duodjefitnodagaid atnigoahtit ortnegiid mat gávdnojit, go mii leat oaidnán ahte dat ruhta mii duodješiehtadusas lea ii adnojuvvo buot. Ohcet álggahandoarjaga dahje ruđa ovdánahttimii ja márkanheiveheapmái. Muittuhan dás vel ahte mis lea šiehtadusa bokte duodjestipeanda joatkkaskuvlaohppiide ja studeanttaide geat váldet alit oahpu. Rekrutteren lea dehálaš doaibma duodjeáŋgiruššama nannemis, ja mii áinnas háliidit árvvoštallat eambbo doaimmaid doarjun dihte duodjái rekrutterema šiehtadusa bokte, loahpaha Myrnes Balto. 

Jearahallama addá ja gažaldagaid vástida sámediggeráđđi Runar Myrnes Balto (NSR), tlf +47 977 73 778, e-post runar.myrnes.balto@samediggi.no