Mikkel Eskil Mikkelsen Vaino Rensberg, Sámediggi

Konferánssa fáddá lea sámi máhtto- ja árvolokten skuvllas. Skuvlafálaldat mii fátmmasta sámi giela, -historjjá, - servodateallima ja kulturárvvuid, ja maid sámi oahppoplánadagus (LK20S) sihke jura njuolga ja eahpenjuolgadit láhčá dili.

Mii jearrat – mii galgá dahkkot vai skuvlla sisdoallu ja hápmi sámáiduvvá, mot oadjebassan dahkat gielalaš identitehta ja mot nannet ohppiid gelbbolašvuođa sámi historjjás, servodateallimis, kulturárvvuid ja vuoigatvuođaid.   

Okta logaldalliin lea Director of Education for the Eskason School Board, Elizabeth Cremo Canadas eret. Son áigu muitalit mot sii leat bargan oččodit álgoálbmot árvvuid skuvlii, ja mot kultuvra lea šaddan oassin skuvllas.

Dasa lassin lea konferánssas sáhka buori ja oadjebas skuvlabirrasa birra.

– Mii diehtit ahte ollu sámi oahppit vásihit givssideami ja vaššicealkámušaid sin sámi gullevašvuođa geažil, dadjá sámediggeráđđi Mikkelsen. Fágaolbmot geat barget psykososiála skuvlabirrasiin áigot konferánssas logaldallat sámecielaheami birra skuvllas, ja makkár váikkuhusat givssideamis leat erenoamášpedagogalaš perspektiivvas, lohká Mikkelsen. 

Lea dehálaš digaštallat ja juogadit vásáhusaid mot iešguđet oassálastit sáhttet ovttasbargat ja váikkuhit dasa ahte sámi sisdoallu heivehuvvo skuvlla oahppoplánaide ja ásahit oadjebas birrasa ohppiide dakkár máilmmis gos givssideapmi ja sámecielaheapmi ain gávdno.

Sámediggeráđđi Mikkel Eskil Mikkelsen sávvá ahte konferánsa buktá sihke eanet  dihtomielalašvuođa sámi sisdollui skuvllas, ja maiddái reaidduid dan sisafievrrideapmái.  Juoga mii sáhttá leat mielde buorideamen ohppiid ja oahpaheddjiid rekrutterema sámegieloahpahussii.

– Konferánssa ulbmil lea addit Sámediggái álgolávki álggahit doaibmi rolla sámi skuvllaid ovddideamis, loahpaha Mikkelsen.

Gažaldagaid vástida dahje jearahallama addá sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no.