Čoahkkin lei Sámedikki parlameantta viesus Kárášjogas, gosa maid sáhtii searvat neahta bokte. Čoahkkimii serve ovddasteaddjit Finnmárkku riddogielddain, Finnmárkku fylkkagielddas, guoskevaš guolástusorganisašuvnnain, aiddo nammaduvvon Vuotnaguolástuslávdegotti láhttut, ja Norgga Riddoguolástussearvi ja Bivdu.

– Vaikke dál lea dehálaš dorskeáigodat, de lea hui deaŧalaš ahte mii deaivvadat. Mii dárbbašat nana ja oktasaš cealkámušaid guolástuspolitihkkii mii sihkkarastá min riddoservvodagaid boahtteáiggi, ja mii čáliimet ollu buriid cealkámušaid Sámedikki guolástuspolitihkkii, dadjá sámediggepresideantta Muotka (NSR).

Čoahkkimis digaštalle maiddái doaibmabijuid birra mat galget sihkkarastit ahte trolafatnasat čuvvot fievrridangeatnegasvuođaid, ja maiddái ráđđehusa čađaheapmi rábas jovkui. Finnmárkku fylkkagielda muitalii maiddái “Team Finnmark” prošeavtta birra, man ulbmilin lea eastadit olmmošlogu njiedjama.

– Ovttasbargu gaskal gielddaid ja organisašuvnnaid lea mearrideaddjin ealaskas riddoservodagaid sihkkarastimis. Lea maid buorre go máŋga láhttu aiddo nammaduvvon Vuotnaguolástuslávdegottis sáhtte searvat, dadjá Muotka movttegit.

Čoahkkin lea dehálaš lávki Sámedikki guolástuspolitihkka hábmemis ovddos guvlui.