–Vuorjašuhttá sakka go Norga ii čuovvul luonddušiehtadusa áigumuša iežas nationála doaibmaplánaevttohusas. Doaibmaplánaevttohus ii dohkket álgoálbmogiid váikkuheami luonddusuodjaleamis, iige dat áŋgiruša geavahit álgoálbmotmáhtu luondduhálddašeamis. Das váilu dáhttu ain suodjalit luonddu, eaige das boađe ovdan vejolaš čovdosat, dadjá sámediggeráđđi Maja Kristine Jåma (NSR).

Sámedikkis ledje stuora vuordámušat luonddušiehtadusa čuovvuleapmái mii dohkkeha álgoálbmogiid váikkuheami luondduvalljivuođa suodjaleamis ja álgoálbmogiid rivttiid.

–Sámi árbevirolaš luondduávkkástallan lea buoremus gáhttenvuohki. Lea sáhka das, ahte birget luonddus ja luondduin, iige dušše ávkkástallat dan resurssaiguin beaktileamos lági mielde. Hálddašeami vuođđun leat vásáhusat, álgoálbmotmáhttu ja guhkesáiggi perspektiiva mii vuhtiiváldá boahttevaš áigodagaid ja buolvvaid, dadjá sámediggeráđđi Maja Kristine Jåma (NSR).

Norgga beale Sámediggi searvá sorjjasmeahttun álgoálbmotorganisašuvdnan ja iešheanalaš dárkodeaddjin COP16:s. Vurdojuvvo ahte oasálaščoahkkin mearrida ođđa bargoprográmma konvenšuvnna artihkkala 8j čuovvuleapmái, mii lea álgoálbmogiid árbevirolaš máhtu vuhtiiváldima birra.

– Mun illudan čuovvut šiehtadallamiid. Sápmelaččaide ja eará álgoálbmogiidda lea dehálaš ahte stáhtat geatnegahttet iežaset nannet álgoálbmotmáhtu vuhtiiváldinbarggu mearrádusain mat gusket luonddu geavaheapmái ja suddjemii. Seamma dehálaš lea ahte álgoálbmogiin lea vejolašvuohta fievrridit álgoálbmotmáhtuset boahttevaš buolvvaide. Dainna ferte bargat, sihke riikkaidgaskasaččat ja nationálalaččat, dadjá Jåma.

Loga eanet dás: Kronihkka: Vejolašvuohta mii manná duššás - Sámediggi