Sámediggi doarju 17 prošeavtta maid ulbmil lea eastadit givssideami ja sámevaši

Sámediggeráđđi lea 2024:s juolludan oktiibuot 2 891 000 ruvnnu 17 prošektii mat galget váikkuhit dasa ahte ovddidit oadjebas ja buori bajásšaddanbirrasa sámi mánáide ja nuoraide, givssideami ja sámevaši haga. Leat hui iešguđetlágan doarjjaoažžut ja prošeavttat maid galget čađahit.

Doarjjaoažžuid gaskkas lea Redd Barna, mii oažžu 200 000 ruvdnosaš doarjaga loktet sámi mánáid ja nuoraid jienaid dáruiduhttinpolitihka ja soabaheami birra eastadan dihtii givssideami ja sámevaši, Duohtavuođa- ja soabahankommišuvnna raportta vuođul. Redd Barna oassálastinproseassain leat sámi mánát ja nuorat dovddahan ahte sii dávjá vásihit ahte máhttu sámi historjjá ja kultuvrra birra lea beare unnán, ja dat lea ráddjejuvvon dihto fáttáide nugo sámi álbmotbeaivái ja boazodollui. Dát dahká saji stereotypiijaide ja boasttuáddejumiide ja ovdagáttuid joatkimii.

Runar Myrnes Balto Ørjan Marakatt Bertelsen

– Sámevašši lea hástalus ja danne lea illudahtti go mii sáhttit doarjut doaibmabijuid main sámi mánát ja nuorat sáhttet leat mielde váikkuheamen ja veahkkin nannemin máhtolašvuođa ja doaibmagelbbolašvuođa givssideami, sámevaši ja rasismma birra, vai beaktilit sáhttet vuosttaldit ja dáistalit dáiguin hástalusaiguin servodagas, dadjá sámediggeráđđi Runar Myrnes Balto (NSR).

Norgga Boazosápmelaččaid Riikkasearvi (NBR) oažžu 200 000 ruvdnosaš doarjaga ovddasmanniprošektii Boazodoalloambassadevrrat skuvllas, man ulbmil lea unnidit riidduid, vuosttaldit cielaheami ja rasismma, ja čilget boasttuáddejumiid ja myhtaid boazodoalu birra eanet dieđu ja ipmárdusa bokte.

– Dát prošeakta áigu čalmmustahttit vaššiságaid sivaid boazodoalu vuostá dan bokte ahte unnidit máhtováilli ja ovdagáttuid mat leat min servodagas. Okta dán prošeavtta nannoseamos beliin lea dat go plánejuvvo skuvlagalledemiid bokte addit ohppiide čiekŋaleabbo ipmárdusa sámi boazodoalu birra, erenoamážit dain guovlluin gos ieža orrot ja ellet, dadjá Myrnes Balto.

Dát prošeavttat leat ožžon doarjaga Sámedikki ođđa ohccivuđot doarjjaortnega Givssideami ja sámevaši eastadeapmi bokte, mii ásahuvvui diibmá. Doarjjaortnet áigu movttiidahttit organisašuvnnaid, joavkkuid ja servviid eastadit ja ovddidit oadjebas ja buori bajásšaddanbirrasa báikegottiin sámi mánáide ja nuoraide. Ortnet joatkašuvvá dán jagi ja das lea rabas ohcanáigemearri gitta skábmamánu 3. beaivái 2025, diibmu 15.30.

Lea máŋggalágan prošeavttat mat leat ožžon doarjaga dán meannudeamis. Dá lea listu mas leat mielde buot 17 prošeavtta mat leat ožžon doarjaga:

Bevilgninger fra tilskuddsordningen Forebygging av mobbing og samehets
Ohcci Bajilčála Juolluduvvon supmi
INNLANDET FYLKESKOMMUNE Lasihuvvon áŋgiruššan rasismma vuostá – buoret fátmmasteapmi   150 000
AILE HEATTA KUHMUNEN Oahpásmuvvat boazodollui ja sámi kultuvrii iešguđetlágan doaimmaid bokte Davvi-siiddas Sáltoduoddaris 119 000
FN-SAMBANDET I NORGE Ovddidit ja nannet boahttevaš oahpaheddjiid návccaid eastadit ja vuosttaldit givssideami ja sámevaši 200 000
AARBORTEN TJIELTE Ráhkadit ovttadássásašvuođa ja addit máhtu ja ipmárdusa nubbi nuppi duogážis, erohusain ja kultuvrrain 109 000
LOABÁGA SUOHKAN Gávdnat buriid metodaid ja reaidduid movt sihkkarastit báikkálaš servodaga mas lea gielalaš, kultuvrralaš ja identitehtalaš ovttadássásašvuohta 200 000
NORGGA BOAZOSÁPMELAČČAID RIIKKASEARVI Unnidit riidduid, vuosttaldit cielaheami ja rasismma, ja čoavdit boasttuipmárdusaid ja myhtaid boazodoalu birra, eanet máhtu ja ipmárdusa bokte 200 000
REDD BARNA Ovddidit álkiduvvon veršuvnna Duohtavuođa- ja seanadankommišuvnna raporttas mánáide ja nuoraide 200 000
ROMSSA SÁMI VIESSU Ásahit arena gos nuorra sápmelaččat sáhttet leat eanetlogus ja ovddidit čeavláivuođa iežaset identitehta ja sámi máŋggabealatvuođas 200 000
Sámi Siida AS Lágidit čoagganemiid mánáide ja nuoraide mas sámi kultuvra, árbevierut ja vásáhuslonohallan lea guovddážis 165 000
ÅARJELSAEMIEN HEALSO-EVIERMIE / SØRSAMISK HELSENETTVERK Lasihit máhtu sámi kultuvrra birra ja daid hástalusaid birra mat sámi mánáin ja nuorain leat 200 000
Saami Council headquarters Ovddidit máhttovuđot ávdnasiid maid sáhttá geavahit eastadit givssideami ja vaši sápmelaččaid vuostá Norggas, Ruoŧas, Suomas ja Ruoššas 200 000
ROMSSA FYLKKAGIELDA Jorgalit Omnimodella sámegillii, modella geavahit aktiivvalaččat Davvi-Norgga oahppi-, fidnooahppi- ja givssidanáittardeaddjit 48 000
ROMSSA SUOHKAN Romssa suohkana ássiide addit máhtu Romssa sámi historjjá ja kultuvrra birra 200 000
TRÖÖNDELAGE FYLHKENTJIELTE Geahččalit ja áimmahuššat sámi perspektiivva ABC-kampánnjas 200 000
TRÅANTEN SAEMIEN DÅEHKIE Deaivvadanbáikkit sámi mánáide, nuoraide ja rávesolbmuide Tråantes 200 000
UNIVERSITEHTA STAVANGERIS Máilmmi stuorámus konferánssas givssideami birra lea fáttá mii fátmmasta givssideami ja cielaheami sámi mánáid ja nuoraid vuostá 100 000
4H FINNMÁRKU Háhkat oadjebas birrasiid gos mánát ja nuorat sáhttet ovddidit iežaset ja earáid kultuvrra rámisvuođa ja áddejumi 200 000
Supmi   2 891 000
Almmuhuvvon 09.01.2025 14.09
Maŋemusat rievdaduvvon 22.01.2025 14.31