Runar Myrnes Balto Liv Inger Somby / Sametinget

Norgga Boazosápmelaččaid Riikkasearvi (NBR) lea ásahan DBS-bálvalusa (dearvvašvuohta, biras ja sihkarvuohta) boazodollui. Sis leat máŋga prošeavtta jođus, ja okta dain lea "Vuosttašveahkki boazodoalus", masa Sámediggi dál lea juolludan doarjaga. Kursa galgá čađahuvvot 15.08.2023 rájes 31.03.2024 rádjai.

Prošeakta galgá kurssaid bokte addit badjeolbmuide vuosttašveahkkegelbbolašvuođa  mii lea erenoamážit heivehuvvon dan beaivválaš boazodollui. Vuosttašveahkkekursa attášii badjeolbmuide eanet oadjebasvuođa dustet váralaš diliid iežaset beaivválaš bargoeallimis.

– Boazodoallu lea okta Norgga váráleamos bargguin, ja lea hui dehálaš bargu maid NBR dál lea čađaheamen. Buorre máhttu vuosttašveahki birra sáhttá leat veahkkin gádjume sihke heakka ja dearvvašvuođa boazodoalus, dadjá sámediggeráđđi Runar Myrnes Balto (NSR).

Kursa lea oaivvilduvvon siidaosiid eaiggádiidda ja buohkaide geat leat boarráseappot go 16 jagi ja gullet siidaoassái. Maiddái fidnooahppit ja bearašlahtut (geain lea juridihkalaš dahje bargooktavuohta siidaoassái) sáhttet oassálastit.

Ulbmil kurssain lea dahkat badjeolbmuid dihtomielalažžan diliid ektui mat sáhttet gáibidit vuosttašveahkkegelbbolašvuođa. Kursa galgá oahpahit badjeolbmuide geavahit improviserejuvvon biergasiid ja ávdnasiid mat badjeolbmos beaivválaččat leat mielde.