Protect Sápmi lea vuođđudus mii bargá áimmahuššat boazodolliid ja earáid vuoigatvuođaid ja beroštumiid Sámis, ja bargá erenoamážit areálahálddašemiin. Vuođđudus lea barggus bokte gávnnahan ahte areálasisabahkkemat dávjá mielddisbuktet boazodollui eanet barggu, stuorát riskkaid ja ekonomalaš vahágiid.

Protect Sápmi lea gávdnosiiddis vuođul gávnnahan ahte lea váilevaš máhttu boazodolliid dearvvašvuođahástalusaid birra mat čuožžilit areálasisabahkkemiid geažil. Danne háliidit sii ovddidit metodihka duođaštan dihtii movt dakkár sisabahkkemat váikkuhit dearvvašvuhtii, vai dearvvašvuođafáktorat váldojuvvojit mielde boahttevaš sisabahkkenáššiin.

— Lea dehálaš ahte mii oažžut ovdan movt areálasisabahkkemat váikkuhit boazodolliid mentála ja fysalaš dearvvašvuhtii. Dát máhttu livččii hui mávssolaš dan bargui ahte sihkkarastit boazodolliide vuoiggalaš meannudeami areálasisabahkkenáššiin, dadjá sámediggeráđđi Runar Myrnes Balto (NSR).

Prošeavtta vuosttaš oasis álggaha Protect Sápmi ovdaprošeavtta mas kárte dearvvašvuođaváikkuhusaid ja mas nanne ovttasbarggu fágabirrasiiguin ovddidan dihtii dárbbašlaš gelbbolašvuođa ja bargoneavvuid prošektii.

Doarjja addojuvvo dearvvašvuođa-, fuolahus- ja mánáidsuodjalusprošeavttaid doarjjaortnega bokte.