NordSalten Avis oažžu doarjaga ovddidit visuála mediafálaldaga julevsámegillii, mii lea oaivvilduvvon nuorra ulbmiljovkui.

– Lea buorre go sáhttit doarjut prošeavtta mii sihke lasiha sámi journalisttaid gelbbolašvuođa digitála sisdoalus ja addá midjiide ođđa váillahuvvon mediafálaldaga julevsámegillii, dadjá sámediggeráđđi Mikkel Eskil Mikkelsen (NSR).

Doarjja juolluduvvo Sierra gielladoaimmat lulli-, ubmi-, bihtán-, julev-, nuortalaš ja márkosámi guovlluide doarjjaortnega bokte.

Giellakursa Bergenis

Birgon sámiid searvi oažžu doarjaga lágidit sámegielkurssa rávisolbmuide. Kursa lea ovddeš kurssaid joatkka ja čuovvu seamma oahppoplána go Sámi allaskuvlla SAAL2 kursa.

– Lea dehálaš ahte sii geat leat čađahan vuosttaš oasi sámegielkurssas besset joatkit giellaoahpahusain. Dát addá sidjiide vejolašvuođa ovdánit viidáseappot alit dássái, ja dat váikkuha dasa ahte sámegiel geavaheddjiid lohku lassána, lohká Mikkelsen (NSR).

Doarjja juolluduvvo Giellaovddidandoaimmat doarjjaortnega bokte.