Sámediggi doarju prošeavttaid maid ulbmil lea buoridit boazodolliid dearvvašvuođa ja unnidit vealaheami ja cielaheami boazosápmelaččaid vuostá. Golbma prošeavtta galget iešguđet ládje buoridit ja ovddidit boazodolliid beaivválaš dili ja dearvvašvuođa.
Sametingspresident Silje Karine Muotka
Ørjan Marakatt Bertelsen
– Dakkár prošeavttat leat dehálaš barggut buoridan dihte boazodolliid beaivválaš dili – sihke fysalaččat, psyhkalaččat ja sosiálalaččat. Mii leat ilus go sáhttit doarjut doaimmaid mat ovddidit oadjebas ja fátmmasteaddji servodaga, dadjá sámediggepresideanta Silje Karine Muotka (NSR).
Prošeavttat mat ožžot doarjaga:
Guovdageainnu suohkan oažžu 270 000 ruvnno rádjái doarjaga prošektii «Sávrres boazobargi». Prošeavttas mii bistá guokte jagi, lea ulbmil buoridit dearvvašvuođa, váikkuhit eallindábiid buorideapmái, ja maiddái eastadit buozalmasvuođaid boazodolliid gaskkas nu, ahte boazodoallit ožžot veahkkeneavvuid maiguin buoremus lági mielde sáhttet fuolahit iežaset dearvvašvuođa.
Orohat 9 oažžu 125 000 ruvnno rádjái doarjaga ovdaprošektii «Čorgaš Fápmu / Helse og robusthet i reindrifta». Orohat áigu earret eará kártet báikkálaš dárbbuid ja ovttasbargomodeallaid iešguđet vahágiid, buozalmasvuođaid ja eará dearvvašvuođaváttuid eastadeami várás boazodolliid gaskkas.
Inger Marie Gaup Eira oažžu 470 000 ruvnno rádjái doarjaga prošektii man ulbmil lea unnidit vealaheami ja cielaheami boazosápmelaččaid vuostá dihto suohkaniin Davvi-Romssas, veahkehit rievdadit olbmuid negatiivvalaš guottuid boazodoalu vuostá ja duddjot ipmárdusa ja árvvusatnima sápmelaččaid, sin geat eai leat sápmelaččat ja fástaássiid gaskkas suohkaniin.
– Maŋŋel go Duohtavuođa- ja seanadankommišuvnna raporta meannuduvvui, de oaidnit ahte eambbo aktevrrat háliidit aktiivvalaččat leat mielde barggus soabadeami ovdii. Dat lea hui buorre. Prošeavttat mat earret eará deattuhit vealaheami ja cielaheami unnideami sápmelaččaid vuostá, leat áibbas dárbbašlaččat vai sáhttá hukset oktavuođaid, nannet luohttámuša ja buoridit ipmárdusa nubbi nubbái.
– Dehálaš maiddái lea doarjut doaimmaid maid ulbmil lea buoridit boazodolliid dearvvašvuođa ja beaivválaš dili, danne go dál eai gávdno nu galle fálaldaga main boazodolliid dearvvašvuohta deattuhuvvo ja mat leat heivehuvvon boazodolliide, loahpaha sámediggepresideanta Silje Karine Muotka (NSR).