–  Sámediggi addá sihke ođđaálggaheddjiide ja earáide vejolašvuođa bargat guolástusain dan bokte ahte leat mielde ruhtadeamen bivdofatnasiid. Mii leat fárus ráhkadeamen bargosajiid miehtá rittu, ja dat lea deaŧalaš sihke ealáhussii ja ahte vai riddoservodagaid viesuin lea čuovga, dadjá sámediggepresideanta Silje Karine Muotka (NSR).

Ole Martin Nygård fitnodat Kárášjogas lea ožžon 300 000 ruvdnosaš doarjaga bivdofatnasa ja bivdoneavvuid investeremii. Nygård áigu šárkkain bivdit dorski, gonagasreappáid, báldáid ja sáiddiid Oarje-Finnmárkkus. Ulbmil lea ásahit bistevaš bargosaji, ja áiggi vuollái addit barggu guovtti olbmui.

Northligth Fishing AS Porsáŋggus lea ožžon 268 000 ruvdnosaš doarjaga oastit Toma nammasaš fatnasa ja reaidduid. Fitnodat lea Leavnnjas ja áigu bivdit gonagasreappáid ja vilgesguoli rittus. Sis lea vásihus guolástusas, ja leat maiddái háhkan alcceset mentora ealáhusas.

Gudmundur Jon Hafsteinsson fitnodagain Hafsteinsson Gáŋgaviika gielddas lea ožžon 250 000 ruvdnosaš doarjaga bivdofatnasa oastimii. Hafsteinsson lea Mehamn báikkis, ja galgá bivdit dorski, sáiddi, dikso, gonagasreappá ja eará guollešlájaid riddoguovlluin. Hafsteinsson cealká ohcamis ahte sii áigot vuovdit guliid iežaset suohkana guollevuostáváldiide, ja go leat buorit bivdosajit lahka de sii sáhttet buktit guliid main lea buorre kvalitehta.

Doarjagat, oktiibuot 818 000 ruvnno, addojuvvojit doarjjaortnegis Vuođđoealáhusat - Mariidna ealáhusat.