Jon-Christer Mudenia
Árvu/Sámediggi
Sámediggi lea juolludan álggahandoarjaga golmma duodjeoasálaččaide investeren- ja ovddidandoarjja,konsuleantaveahki ja álggahandoarjja doarjjaortnega bokte. Ortnet galgá váikkuhit profešonaliserema ja dietnasa loktemii Sámediggedieđáhusa duoji birra ealáhussan vuođul.
Sámedikki mihttomearri lea ovddidit duoji boahtteáiggediđolaš ja geasuheaddji ealáhussan. Álggahandoarjaga bokte háliida Sámediggi váikkuhit dasa ahte eanebut sáhttet ovddidit ceavzilis doaimmahusaid mat leat vuođđuduvvon sámi kultuvrii, máhttui ja duodjeárbevieruide.
- Sámediggi háliida láhčit dili nu ahte ođđa oasálaččat sáhttet sajáiduvvat ja ovddidit eallinfámolaš doaimmaid. Álggahandoarjagat lea dehálaš váikkuhangaskaoapmi ođđa duojáriid rekrutteremis ja árbevirolaš máhtu viidásetfievrredeamis, dadjá doaibmi sámediggepresideanta Jon-Christer Mudenia.
Doarjja ođđaáhahemiide
Duodji lea deaŧalaš kulturguoddi, ja Sámediggi oaivvilda ahte lea vejolašvuohta duoji ovdánahttit eanet ealáhuslažžan. Máhtu fievrrideapmi ja rekrutteren duodjeealáhussii leat guovddáš mihttomearit, ja álggahandoarjagat leat dehálaš váikkuhangaskaoapmin ođđa álggaheddjiid nannemis.
Čuovvovaš doaimmahusat leat ožžon álggahandoarjaga:
- Dessa Lundberg duodji lea ožžon 110 000 ruvnno ásahit ceavzilis ja fidnolaš duodjefitnodaga mas buvttaduvvo árbevirolaš duodji.
- Anja Lona duodji lea ožžon 166 300 ruvnno ásahit fitnodaga ja ovdánahttit buvttadeami ja gávppi duojis mas lea vuođđu Unjárgga árbevieruin.
- Oskal Eira duodji lea ožžon 149 250 ruvnno ásahit ceavzilis doaimma mii fállá sámi boahkániid ja eará buktagiid árbevirolaš duojis.
Guhkesáigásaš áŋgiruššan duodjeealáhussii
Sámedikki mielas lea duodjeealáhusas stuorra ovdánanvejolašvuohta. Iešguđet váikkuhangaskaomiid bokte áigu Sámediggi váikkuhit árvolassáneapmái ja eanet ceavzilis bargosajiide sámi ealáhusaide. Álggahandoarjagat dahket álkibun ođđa oassálaččaide álgit ja ovddidit iežaset fitnodagaid.
- Jus duodji galgá ovdánahttojuvvot boahtteáigásaš ealáhussan, de fertet mii láhčit dili nu ahte ođđa duojárat dustet áŋgiruššat. Álggahandoarjagiid bokte háliida Sámediggi álkidahttit álggahit iežas fitnodaga ja ráhkadit saji sihke innovašuvdnii ja árbevirolaš sámi máhtu bisuheapmái, dadjá Mudenia.