Áigumuš lea ollásit ođasmahttit dološ mearraskajá ja hukset ođđaáigásaš turistaguovddáža mii čuovvu mearrasámi huksenvieruid ja estetihka. Guovddáš galgá leat ealli deaivvadanbáiki, gos gaskkustuvvo ja seailluhuvvo mearrasámi kultuvra, giella ja historjá - sihke báikkálaš olbmuide ja earáide.

– Mearrasámi kultuvra lea dehálaš resursa mátkeealáhusa ovdánahttimii. Guoddevaš álgoálbmotturisma sáhttá veahkehit ealáskahttit kultuvrra ja giela, lasihit máhtu ja rámisvuođa ja maiddái loktet árvoháhkama sámi guovlluin, dadjá sámediggepresideanta Silje Karine Muotka.

Prošeakta galgá čalmmustahttit sámi leahkima dakkár guovllus gos dáruiduhttin lea váikkuhan garrasit. Mihttun lea hábmet fátmmasteaddji saji sihke vásáhusaide ja oahppamii, mas gudnejahttet báikkálaš árbevieruid.

Doarjja juolluduvvo doarjjaortnegis Sámi mátkeealáhusat, hutkásealáhusat ja sámi biebmu.