Runar Myrnes Balto
– Lea dehálaš fuolahit ja doarjut sámi mánáid ja nuoraid geat dárbbašit doaimmaid mat gusket sin gillii ja kultuvrii. Danne doarju sámediggeráđđi prošeavtta, nu ahte biebmoruovttumánáin ja nuorain lea vejolašvuohta deaivvadit ja hukset fierpmádaga, dadjá sámediggeráđđi Runar Myrnes Balto (NSR).
Norgga Biebmoruovttosearvvi mihttu lea buoridit kvaliteahta buot dásiin biebmoruovttufuolahusas, maid sámi sisdoalu. Dehálaš oassi barggus lea maid doaimmahit politihkalaš beroštumi nationála, regionála ja báikkálaš eiseválddiiguin buoridan dihte biebmoruovttufuolahusa.
– Dat lea dehálaš fállat oktasaš deaivvademiid sámi bearrašiidda gos oktasaš sámi perspektiiva lea vuođđun. Seammás lea min oktasaš ovddasvástádus sihkkarastit mánáide ja nuoraide buriid ja oadjebas sámi biebmoruovttuid, lohká Myrnes Balto.
Guhtta čoagganeami leat plánejuvvon, golbma čoagganeami láhččojuvvojit nuoraide ja golbma leat nu gohčoduvvon bearaščoagganeamit. Čoagganemiid galgá juohkit golmma fylkii, Nordlánda, Romsa- ja Finnmárku.
Loga eanet biebmoruovttuid birra
Juolludeapmi lea dearvvašvuođa, fuolahusa- ja mánáidsuodjalanbálvalusprošeavttaid bokte addon.
Jearahallama addá dahje vástida gažaldagaide sámediggeráđđi Runar Myrnes Balto (NSR), runar.myrnes.balto@samediggi.no