Sámediggeráđđi ovddida ášši njuolga Sámedikki dievasčoahkkimii árvvoštallamii ja vejolaččat ođđa lága doarjumii dan geažil go ráđđehus lea bidjan oanehis áiggi dása ja ovttamielalašvuođa geažil hálddahuslaš konsultašuvnnain gaskal Sámedikki ja Eanadoallo- ja biebmodepartemeantta (LMD) ja Dálkkádat- ja birasdepartemeantta (KLD).

Maja Kristine Jåma Árvu/Sametinget

– Maŋŋel go láhkaevttohus lei gulaskuddamis ja maŋŋel proseassa konsultašuvnnaiguin leat boahtán čielga buorideamit sámiid vuoigatvuođaid ja bivdovejolašvuođaid ektui. Dát leat deaŧalaš olahusat vai mis galgá leat vejolašvuohta doaimmahit ja ovddidit kultuvramet dál ja boahtteáiggis, dadjá sámediggeráđđi Maja Kristine Jåma (NSR).

Sámediggi lea ožžon guokte deaŧalaš paragráfa láhkii, mat galget suodjalit sámi kultuvrra luondduvuođu ja čielggasmahttit sámiid vuoigatvuođaid álgoálbmogin álbmotrievtti vuođul.

Sohppojuvvui maiddái viiddidit čilgejumi das makkár mearkkašupmi bivddus ja háhkamis lea sámi kulturdoaimmaheapmái ja árbevieruide, meahcásteapmái, láhkaproposišuvnna álggaheamis. Dasto lea boahtán sierra láhkamearrádus giđđaloddemii. Dasa lassin lea vuoigatvuohta bivdit ja guolástit boazodoalu oktavuođas sihkkarastojuvvon sierra láhkamearrádusas, ja rievssatgárdunlohpi jotkojuvvo.

– Bivdu leat dehálaš oassi sámi kultuvrras ja eallinvuogis, ja das lea stuorra mearkkašupmi giela, identitehta, máhtu ja árbevieruid viidáset ovddideapmái, dadjá Jåma. Son oaivvilda ahte dát doaimmat nannejit gullevašvuođa guovlluide gos mii eallit ja mainna mii eallit, ja min iežamet iešbirgejumi.

– Lean duhtavaš deaŧalaš buoridemiiguin mat leat sohppojuvvon, erenoamážit giđđaloddema sihkkarastin sámi kultuvrra ja árbevieruid várás. Šaddá miellagiddevaš čuovvut digaštallama Sámedikki dievasčoahkkimis ja gullat guorrasit go sii dasa vai eai, dadjá Jåma.

Ealáhus- ja kulturlávdegoddi galgá meannudit Sámedikki oainnu ođđa fuođđoresursaláhkii 9. vahkus, ja ášši digaštallojuvvo viidáseappot Sámedikki dievasčoahkkimis duorastaga njukčamánu 13. beaivvi. 

Áššebáhpirat dárogillii: 007/25 Sametingets syn på den nye viltressursloven