– Oassin Duohtavuođa- ja seanadankommišuvnna raportta čuovvoleamis oaidnit dárbbu lasihit rahčamušaid rávisolbmuidoahpposuorggis. Leat ollu sápmelaččat geat lea massán vejolašvuođaidasas oahppat gielaset ja kultuvrraset birra. Sidjiide ferte heivehit fálaldaga gielaset ja kultuvrraset ruovttoluottaváldimii, dadjá sámediggeráđđelahttu Maren Benedicte Nystad Storslett (NSR). 

Dálá rávisolbmuidoahppofálaldaga sisdoallu lea sihke formála ja eahpeformála oahppu, mii fállojuvvo earret eará oahppolihtuid, oahppoinstitušuvnnaid, giellaguovddážiid, ja kurssaid ja doaimmaid bokte maid searvvit ja organisašuvnnat lágidit.  

– Nationálalaš rávisolbmuidoahppopolitihkka lea buorre muddui heivehuvvon stuorraservodaga dárbbuide. Mii dárbbašat heivehuvvon fálaldagaid mat dustejit sámi servodaga dárbbuid, dadjá Nystad Storslett. 

Árvaluvvon strategiija mihttu lea dahkat rávisolbmuidoahpu sámegielas ja -kultuvrras eanet olámuttos ja buorebut heivehuvvon. Sámi Oahppolihttu galgá nannejuvvot čoavddainstitušuvdnan sámi rávisolbmuidohppui, ja sámi gelbbolašvuohta bargoeallimis galgá áŋgiruššamiin nannejuvvot. Seammás áigu Sámediggi bargat dan ala ahte nationálalaš rávisolbmuidoahppopolitihkka eanet vuhtiiváldá sámi perspektiivva ja dárbbuid. 

Bajásšaddan-, fuolahus- ja oahppolávdegoddi galgá 9. vahkus meannudit Sámedikki rávisolbmuidoahpu strategiija. Sámedikki dievasčoahkkin joatká duorastaga njukčamánu 13. beaivvi ášši digaštallamiin. 

Áššebáhpárat: 009/25 Sámedikki rávisolbmuidoahpu strategiija