Norgga stáda bealis lea unnon ruhtajuolludeapmi sámi oahpponeavvuid váste, mii dagaha ahte Sámediggi šaddá rievdadit vuoruheami sámi oahpponeavvuid ektui.
– Sámediggeráđđi oaidná dárbbu vuoruhit oahpponeavvoráhkadeami fágain main Sámediggi mearrida oahppoplánaid. Mii vuordit ahte Máhttodepartemeanta váldá stuorit ovddasvástádusa buvttadit sámi oahpponeavvuid fágaide maidda Máhttodepartemeantta mearrida oahppoplánaid, dadjá Mikkelsen.
Oahpponeavvoráhkadeami kvalitehta sihkkarastima váras áigu sámediggeráđđi ráhkadit kvalitehtaeavttuid sámegielat oahpponeavvuid várás. Sámediggeráđđi lea ođasmahttojuvvon doaibmaplánas divvon fágavuoruhemiid jagi 2023 ektui, ja lea bidjan vuoruhemiid 2024 jahkái, mat leat vuođđun boahtte guokte jagi oahpponeavvoráhkadeapmái Sámedikkis.
– Vaikko mii leat vuoruhan fágaid, de mii leat álo rahpasat árvvoštallat dárbbuid mat čuožžilit sámi skuvlla oahpponeavvodilálašvuođas ja láhčit dili buoremusat Sámedikki rámmaid siskkobealde, dadjá Mikkelsen.
Sámediggeráđđi oaidná dárbbašlažžan ain vuoruhit digitála oahpponeavvuid, mat duhtadit dálá láhkagáibádusaid ja vuordámušaid. Ain váilot sámegielat oahpponeavvut ja lea dárbu jođánit válbmet oahpponeavvuid.
– Mii áigut ain vuoruhit prošeavttaid main lea beaktilis buvttadanáigi, ja loahpahit prošeavttaid mat eai leat čađahahttit dan áiggis maid Sámediggi sáhttá dohkkehit, dadjá Mikkelsen.
Sámediggeráđđi oaidná maid ahte sámegielat oahpponeavvuid gaskkusteapmi ja diehtojuohkin gáibida čielga ja diđolaš áŋgiruššama. Sámi oahpponeavvuid geavaheaddjit buktet máhcahagaid ahte sii ohcalit buoret diehtojuohkima ođđa oahpponeavvuid birra.
– Lea dárbu doaibmabijuide mat buoridit diehtojuohkima sámegielat oahpponeavvuid birra. Mii áigut dan dihte dán áigodagas árvvoštallat beliid ja bidjat johtui doaibmabijuid mat buoridit oahpponeavvogaskkusteami, dadjá Mikkelsen.
Sámedikki dievasčoahkkin meannuda ášši duorastaga juovlamánu 8. beaivvi.
Áššebáhpirat áššái 55/22 Oahpponeavvoráhkadeami doaibmaplána 2020-2024 ođasmahttin
Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no