Sámediggeráđđi lea geasset dárkilit árvvoštallan ja analyseren diggegotti duomu.

– Mii oaivvildit ahte diggi boastut árvvoštallá mii konsultašuvnnaid vuođđu ja sisdoallu lea. Konsultašuvnnat leat álgoálbmotrievtti geađgejuolgi, ja daid ii sáhte duššindahkat nugo diggi vállje dahkat dán áššis, dadjá sámediggepresideanta Silje K. Muotka.

Sámediggeráđđi ii leat ovtta oaivilis dikkiin das ahte Muolkkut-mearrádus ii mielddisbuvtte stuora sisabahkkemiid ja fápmorusttegiid huksema, ja ahte dat danne ii gáibit váikkuhusguorahallamiid.

– Ii leat eahpádus ge das ahte Muolkkuid elektrifiseren vuolggaha huksenbargguid mat njuolga čuhcet sámi luondduvuđđosii, loahpaha Muotka.