– Jus stáhta sáhttá dahkat deháleamos mearrádusaid álggos ja de konsulteret sámi beroštumiid maŋŋil, de mii riskeret ahte konsultašuvnnat bohtet menddo maŋŋit ja ahte dain ii leat duohta mearkkašupmi. Dát lea dat prinsihpalaš gažaldat maid mii dáhttut Alimusrievtti čielggadit, dadjá sámediggepresideanta Silje Karine Muotka (NSR).
Borgarting lágamánneriekti hilggui golggotmánu 15. b. Sámedikki váidaga Hammerfest LNG elektrifiserema áššis Muolkkuin. Sámediggi doahttala duomu, muhto ii leat ovttaoaivilis duopmostuolu konklušuvnnain konsultašuvdnageatnegasvuođa hárrái.
Muolkkuid elektrifiseren eaktuda viiddis fápmolágideami. Danne oaivvilda Sámediggi ahte lea dárbbašlaš geahččat elektrifiserema mearrádusa oktii maŋit mearrádusaiguin mat gusket fápmobuvttadussii ja fápmolinjjáide.
Guovddáš gažaldat lea movt sámelága eaktu dan birra ahte mearrádus galgá sáhttit váikkuhit sámi beroštumiid «njuolga» galgá ipmirduvvot go mearrádus bidjá deaŧalaš premissaid maŋit áiggi luonddusisabahkkemiidda.
– Stuora huksemiid eai mearrit dušše ovttain mearrádusain. Dat dáhpáhuvvet lávkkiid mielde. Muhto sámi báikegottiide ja ealáhusaide leat dat oppalaš váikkuhusat mat mearkkašit juoidá. Mii dárbbašit čielggadeami das movt konsultašuvdnavuoigatvuohta galgá sihkkarastojuvvot go mearrádusat gullet oktii, dadjá Muotka.
Sámediggi oaivvilda ahte konsultašuvdnageatnegasvuohta ferte sáhttit addit duohta váikkuhanfámu dakkár áigemuttus go ain gávdnojit molssaeavttut ja ain lea doaibmanvejolašvuohta.
– Dás lea sáhka prinsihpalaš gažaldagain sámi mielmearrideami vuhtiiváldima birra. Konsultašuvnnat galget leat eanet go dušše vejolašvuohta cealkit juoidá váikkuhusaid birra mearrádusain mat leat juo dahkkon. Konsultašuvnnat galget addit duohta vejolašvuođa váikkuhit mearrádusaide, dadjá Muotka.
Prinsihpalaš gažaldagat
Sámediggi oaivvilda ahte ášši buktá ovdan gažaldaga mas lea stuorra mearkkašupmi boahttevaš fápmohuksemiid, industriija ja infrastruktuvrra mearrádusaide sámi guovlluin.
– Mii oaivvildit ahte lea deaŧalaš ahte Norgga alimus duopmostuollu oažžu vejolašvuođa čielggadit daid gažaldagaid maid dát ášši buktá. Áššis lea sáhka das movt stáhta galgá ollašuhttit geatnegasvuođaidis sámi álbmoga ektui go stuora servodatmearrádusat váikkuhit sámi kultuvrra ja ealáhusdoaimmaheami luondduvuođu, dadjá Muotka.
Leat vuđolaččat árvvoštallan goluid ja riskka
Sámediggi lea árvvoštallan sihke rievttálaš ákkaid, goluid ja riskka guoddaleamis. Lea alla rádjá oažžut áššiid meannuduvvot Alimusrievttis, ja Sámediggi ii leat ožžon doarjaga guovtti ovddit riekteásahusas.
– Mii diehtit ahte ii leat daddjon ahte Alimusriekti meannuda ášši. Mis lea bajilgovva das maid ođđa áššemeannudeapmi sáhttá mielddisbuktit goluid ektui.. Min advokáhtat leat addán midjiide šiehtadusa mas bajit rádji lea miljovnna ruvnno sihke guoddaleami válmmaštallamii ja Alimusrievtti gieđahallama goluide. Mii váldit goluid duođas. Dat vihkkeduvvojit dan dárbbu ektui prinsihpalaš čielggadeapmái. Konsultašuvdnavuoigatvuohta lea vuđolaš oassi sámiid vuoigatvuođas guldaluvvot ja oažžut váikkuhanvejolašvuođa áššiin mat gusket midjiide, dadjá Muotka.
Sámediggi lea almmuhan bajilgova goluin mat čatnasit dievasčoahkkinmearrádusa 026/24 rievttálaš čuovvoleapmái, mearriduvvon geassemánu 12. beaivvi 2024. Bajilgovva ođasmahttojuvvo dađistaga.
Geahča gollobajilgova
Guoddaleapmi sáddejuvvo ovdal guoddalanáigemeari skábmamánu 16. b. 2026.
Duogáš
Sámedikki dievasčoahkkin attii geassemánu 12. beaivvi 2024 sámediggeráđđái fápmudusa vuolggahit ášši stáhta mearrádusa lobálašvuođa birra Hammerfest LNG elektrifiseremis.
Sámediggi ii ožžon doarjaga diggerievttis suoidnemánus 2025 iige lágamánnerievttis golggotmánu 15. b. 2026.
Loga ášši 26/24 Čuovvoleapmi Sámedikki mearrádusas Muolkkuid elektrifiserema ektui
Loga ášši 42/23 Sámedikki oaivil Muolkkuid elektrifiserema birra
Dávjá jerrojuvvon gažaldagat Muolkkut-áššis