Hurdal-julggaštusas lohká ráđđehus ahte áigu "addit suohkaniidda stuorit vejolašvuođa stivret ruhtadeami ja gáibádusaid priváhta mánaidgárddiide seammás go ráđđehus čuovvula storberget- lávdegotti evttohusa rievdadit priváhta mánaidgárddiid ruhtadeami."

Sámediggi dáhttu ahte dát čuovvuluvvo viidáseappot áššedovdilávdegotti bokte, mii dárkkista sámi mánáid vuoigatvuođaid mánáidgárdelágas.

Eahpečielga láhkamearrádusat

Mikkel Eskil MikkelsenMikkelsena mielas eai veahket dálá láhkamearrádusat man ge ládje suohkaniid sin barggus sámi mánáiguin. Lága sátnádat cealká ahte lea suohkaniid ovddasvástádus ahte mánáidgárddit sámi suohkaniin "huksejuvvojit" sámi mánáid giela ja kultuvrra ektui, ja eará suohkanat galget "láhčit dili" giela ja kultuvrra ovdáneapmái.

–ahte dan sáhttá dulkot vaikke movt. Ii veahket gean ge ahte láhkamearrádus lea eahpečielggas, ii suohkana, váhnemiid iige mánáid. Maid mearkkaša "hukset" dahje "láhčit dili" sámi gillii ja kultuvrii? Sátnádat ii atte buori vuođu oadjebas ja buori mánáidgárdái sámi mánáide, ja fálaldagat šaddet iešguđetláganat riikkas, dadjá Mikkelsen.

Dáhttu áššedovdilávdegotti

Maŋemus jagiid leat máŋggas geahččalan gávnnahit mii sámi mánáidgárdi duohtavuođas lea, movt sii barget ja mii lea sámi mánáidgárddiid vuođđu. Mikkelsen dadjá ahte dán máhtu álkit sáhttá fievrridit áššedovdilávdegoddái mii fas sáhttá evttohit rievdadit mánáidgárdelága.

– Lea stuora ávkin mánáidgárdeeaiggádiidda diehtit juste mii lea sámi mánáidgárdi, ja ahte leat čielga mihtut movt nannet giela, kultuvrra ja identitehta. Áššedovdilávdegoddi sáhttá čohkket visot dán máhtu, ovttas KS:in, sámi fágaolbmuiguin ja mánáidgárdesurggiin muđui, evttohan dihte ođđa láhkateavstta ja evttohit doaimmaid mat nannejit suohkana vejolašvuođa lihkostuvvat sámi mánáidgárdedoaimmain. Jáhkán olu suohkanat háliidit čielga láhkamearrádusa ja doaibmaevttohusaid, dadjá Mikkelsen.

Gažaldagaid dahje jearahallama addá sámediggeráđđi  Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no