Sámediggi váldá duomu diehttevassii, muhto ii leat veaháge ovttaoaivilis rievtti árvvoštallamiid hárrái.  Sámediggi mielas duopmu hedjonahttá sihke sámi beroštusaid riektesuoji ja konsultašuvdnageatnegasvuođa doahttaleami, mii lea nannejuvvon sámelágas, Vuođđolága 108. §:s ja riikkaidgaskasaš olmmošvuoigatvuođageatnegasvuođain, maiddái ILO-konvenšuvnnas nr. 169 ja SP 27. artihkkalis.

– Oaivvildan dohkketmeahttumin ahte dakkár mearrádusa olis, mii dagaha ahte Finnmárkku elfápmobalánsa sakka rievdá – ja mii mielddisbuktá eambbo elfápmolinnjáid huksema ja vejolaččat eambbo elfápmobuvttadeami, eai ane ahte lea geatnegasvuohta konsulteret, dadjá sámediggepresideanta Silje Karine Muotka (NSR).

Go nie dulko ášši, de dat dagaha ahte ollislaš árvvoštallamat ja álgoálbmogiid mielmearrideapmi eai váldojuvvo vuhtii doaibmabijuin mat njuolga gusket min kultur- ja ealáhusvuđđui.

– Mii oaivvildit duomu mearkkašit dan ahte duođalaš áššemeannudanboasttuvuohta dohkkehuvvo rievttálaččat, dadjá sámediggepresideanta.

Stáhta ii leat konsulteren Sámedikkiin iige guorahallan movt PUD/PAD-mearrádusa rievdadeapmi ollislaččat váikkuha sámi kultuvrii ja boazodollui. Dat čuohcá riektesihkarvuhtii ja dagaha luohttámuša ovdii stáhta proseassaide áššiin mat sakka váikkuhit sámi servodahkii.

Sámediggi áigu dál vuđolaččat lohkat duomu ja árvvoštallat movt ášši berre čuovvoluvvot rievttálaččat ja politihkalaččat.