Sámediggeráđđi Runar Myrnes Balto (NSR), geas lea ovddasvástádus Sámedikki bušeahtas, dovddahii stuorra ilu go ođas bođii ovdán: 

– Dát lei duođai buorre ođas. Mii leat hirbmat ilus go Stuorradikki eanetlohku dál lea guldalan dárbbuid maid mii leat čujuhan máŋggaid jagiid. Háliidan sáddet erenoamáš giitosa sidjiide geat leat bargan dan ovddas šiehtadallamiin, dadjá Myrnes Balto. 

Sámediggeráđđi oaidná dán lunddolaš čuovvuleapmin Duohtavuođa- ja seanadankommišuvnna raportii.  

– Sápmelaččat fertejit ieža beassat mearridit mo sii háliidit čađahit divvunbargguid Sámedikki bokte maŋŋil dáruiduhttima, ja dasa čujuhit bellodagat ieža ge, dadjá Myrnes Balto. 

Sámediggeráđđi pláne ahte ruđat juogaduvvojit Sámedikki dievasčoahkkimis njukčamánus, sierra bušeahttaođasmahttima bokte. Dábálaččat reviderejuvvo bušeahtta dušše geassemánus. 

– Sámedikki dievasčoahkkin meannuda min dábálaš bušeahta juo duorastaga, nu ahte mii eat olle dan dál. Muhto mii eat hálit vuordit menddo guhká oažžut ruđaid sámi álbmogii, danne mii áigut evttohit juohkima juo njukčamánu dievasčoahkkimis, loahpaha Runar Myrnes Balto.