Tromsø IL (TIL) ja Sámediggi leat vuolláičállán ovttasbargojulggaštusa. TIL beaivválaš jođiheaddji Øyvind Alapnes ja sámediggeráđđi Runar Myrnes Balto. Tina Gjøvik, TIL

– Ii leat eará go sávvat lihku TIL:i ođđa stádionnamain. Romssa Arena oainnusmahttá Romssa sámi báikenama, ja dat lea hui buorre. Das lea stuora symbolaárvu go fylkka stuora spábbačiekčanjoavku dás duohko bovde ruovttučiekčamiidda stádionii mas lea sámi namma, dadjá sámediggeráđđi Runar Myrnes Balto (NSR).

Sámediggi ja TIL leat áiggi mielde gulahallagoahtán eanet ja eanet. Dál go TIL lea gávppálaš šiehtadusa dahkan Romssa Arena nama atnimis stádionnamman, de lea leamaš lunddolaš čielggadit Sámedikki ja TIL gaskasaš ovttasbarggu rámmaid.

– Mii leat hui movttegat go TIL čájeha geainnu ja áigu oainnusmahttit sihke sámi giela ja kultuvrra nie alla dásis. Ovttasbargoguoibmin mii háliidit sáhttit váikkuhit dasa ahte sámevuođa oainnusmahttet buori ja árvvolaš vuogi mielde stádionis, dadjá Myrnes Balto.

Šiehtadus dasto maid signalisere ahte bealit ovttasráđiid áigot árvvoštallat álggahit lassi doaimmaid mat dorjot sámegiela geavaheami valáštallamis, ja maiddái doaimmaid mat eastadit cielaheami ja vaššicealkámušaid valáštallanarenain.

– TIL lea movttet go dál vuolláičállit ovttasbargojulggaštusa Sámedikkiin oktasaš áŋgiruššama birra sámi giela ja kultuvrra ovdii. Mii leat iežamet áŋgiruššamiid olis sámiid cielaheami vuostá oaidnán man dehálaš dat lea. Min ovttasbargu Sámedikkiin šaddá oassin stuorát áŋgiruššamis masa oažžut mielde eambbo aktevrraid mat ovddidit sámi giela ja kultuvrra, dadjá Romssa valáštallansearvvi (TIL) beaivválaš jođiheaddji Øyvind Alapnes.

Loga ovttasbargojulggaštusa Sámedikki ja Romssa valástallansearvvi (TIL) gaskka (JPG, 2 MB)

Romssa várresátnejođiheaddji Marlene Bråthen, Tromsø IL beaivválaš jođiheaddji Øyvind Alapnes, Troms Kraft konsearnahoavda Semming Semmingsen, sámediggeráđđi Runar Myrnes Balto ja Romssa ja Finnmárkku fylkaráđđejođiheaddji Kristina Torbergsen. Tina Gjøvik/TIL