Siw-Merete ja Morten Risto Ráissas buvttadeaba gáiccamielkki, vuovdiba villasávzalábbáid ja ráhkadeaba gáiccavuosttá. Soai áiguba viiddidit doaibmavistti vai beassaba lasihit mielke-, vuostá- ja biergobuvttadeami. Sámediggeráđđi lea juolludan 400 000 ruvnno viiddideapmái.

Hans Ole Eira– Romssa gáicabirrasii lea hui buorre ahte boanddat válljejit áŋgiruššat gáiccadoalus. Dat ahte soai viidásetbuvttadeaba gáiccamielkki ja gihccebierggu, sihkkarastá doarvái sisaboađu vai eanadállodoalus lea birgejupmi goappašagaide, dadjá Eira.

Smávvadállodoalus Molunds småbruk, maid Dagrun ja Per Molund eaiggáduššaba, lea ekologalaš sávzadoallu Rivttágis. Sudnos leat dál 84 villasávzza ja áiguba viiddidit vai leat 96 villasávzza. Villasávzzat leat dál olgun ja soai áiguba hukset doaibmavistti vai sávzzaide lea suodji dálvet, ja giđđat ges sáhttá visti geavahuvvot sávzzaid guoddináiggi. Soai viidásetbuvttadeaba buot lábbábierggu ieža ja vuovdiba priváhta márkanis. Sámediggeráđđi lea juolludan 295 000 ruvnno vistái.

– Juolludeapmi čuovvu Sámedikki politihka nannet bierggu viidásetbuvttadeami ja eanet báikkálaš biepmu buvttadeami, dadjá Eira.

Sivert Andreas Olli Porsáŋggus lea váldán badjelasas eanadállodoalu dán jagi ja áigu ođastit vistti ja monteret bohčinrobohta. Sámediggeráđđi lea juolludan 500 000 ruvnno dán bargui. Ollis leat dál 13 guiggu ja maŋŋel viiddideami galgá sadji 16 guigui.

– Sámediggái lea dehálaš doarjut sin geat háliidit ođasmahttit iežaset dállodoaluid, ja erenoamáš dehálaš lea go nuorra olbmot áigot investeret. Dáinna investeremiin šaddá álkibun nuorra bondii bargat viidáseappot dállodoaluin, dadjá Eira.

Jearahallama addá dahje vástida gažaldagaide sámediggeráđđi Hans Ole Eira (Gb), mob. +47 918 61 471, hans.ole.eira@samediggi.no.