Dáinna pilohtaprošeavttain háliida Kárášjoga gielda čalmmustahttit gullui teknihkalaš reaidduid rávisolbmuide geat leat badjel 18 jagi. Sii geat leat massán gulu ožžot sámegielat dearvvašvuođabargiiguin čuovvuleami ja oahpu. 

Runar Myrnes Balto

— Dán prošeavttas sáhttá stuora mearkkašupmi guluhemiide, ja danne lea dehálaš veahkkin sámi álbmogii addit dásseárvosaš bálvalusaid. Máhttit atnit teknalaš reaidduid sáhttá dagahit ahte oasálastin sosiála eallimis, oahpahusas ja bargoeallimis ovddiduvvo. Hálddašeapmi maid eastada doaibmamassima ja kognitiiva demeanssa, oktonasvuođa ja isolašuvnna, dadjá sámediggeráđđi Runar Myrnes Balto (NSR).

Sámedikki mielas lea dehálaš ahte sámi guluheamit ožžot ovttaárvosaš fálaldaga sámegillii, ja eai liiko go buot dieđut ja oahpisteapmi dál lea dušše dárogillii.

— Otná dilli, go sámi guluheamit ožžot measta juo buot dieđuid ja oahpahusa dárogillii, lea áibbas arvvuheapme. Dárbbahuvvojit doaibmabijut heivehuvvon geavaheddjiide main lea vuolggasadji sámi gielas ja kultuvrras ja mii lea sámegillii. Lean ilus go dát prošeakta fállá sámegielat čuovvuleami ja oahpahusa sámegillii, dadjá Myrnes Balto.

Sámediggi deattuha maid ahte prošeakta galgá váikkuhit dasa ahte dearvvasvuođabargiin loktana gelbbolašvuohta.

— Ii eahpiduvvo ge ahte gelbbolašvuođalokten dárbbašuvvo dearvvasvuođabálvalusa bargiin sámiid birra geat leat massán gulu, ja sámi giela ja kultuvrra birra. Min mielas lea dat dehálaš oassi prošeavttas, ja mii sávvat lihkku Kárášjoga gildii, lohka Runar Myrnes Balto.

Jearahallama addá ja gažaldagaid vástida sámediggeráđđi Runar Myrnes Balto (NSR), +47 977 73 778, runar.myrnes.balto@samediggi.no.