Sámediggeráđđi Maren Benedicte Nystad Storslett čilge ahte leat árvvoštallan ohcamuša dainna jurdagiin ahte lea guovlu gos stuora hástalusat čuožžilit guohtuneatnamiid geavaheamis gaskkal boazodoalu ja eará ássiid guovllus. Dát dagaha váttis dili guovllu sámi álbmogii.

–  Innlandet fylkkasuohkan lea maŋemus jagiid mearrediđolaččat bargan buoridit sámiid dili guovllus, ja dát lea oktiiheivehuvvon Duohtavuođa- ja seanadankommišuvnna raporta ávžžuhusaide. Mihttu doarjjaortnegiin lea aktiivvalaččat ja mearrediđolaččat ovttasbargat regionála ja báikkálaš eiseválddiiguin nannendihte ja ovdánahttindihte  kultuvrra, giela ja servodateallima, dadjá Nystad Storslett.

Suohkan lea ovttas Svahken Sijte, Innlandet fylkkasuohkaniin ja ANNO museain identifiseren máŋga dehálaš áŋgiruššansuorggi vuoi regiovnnas čalmmustahtto ja nannejuvvo lullisámi kultuvra.

Sii háliidit earret eará:

• Čuovvulit ohcamuša lahttuduvvot sámi hálddašanguovlluide.
• Bargat lullisámi giellaguovddáža ásahit Engerdal:i.
• Nannet lullisámi kultuvrra gaskkusteami Blokkodden meahccemuseas, Daniel Mortensson orrunbáikkis ja Glomdalmuseas Elverum:s
• Čuovvulit ohccámuša sámi báikenama dohkkeheami ektui Engerdal:s ja Innlandet fylkkasuohkanis.
• Ovdánahttit sámi álbmotbeaivvi ávvudeami, guovvamánu 6.beaivvi, sihke báikkálaččat ja regiovnnalaččat.

Doarjja addo regionálaovddidanprošeavttaid doarjjaortnega bokte.