Kulturdoaibmabijuid doarjjaortnega bokte juolluduvvo 1 092 100 ruvnno doarjjan prošeavttaide mat galget sin prošeavttaid bokte ovddidit sámi dáidaga ja kultuvrra, oktan sámi giela, kulturárbbi ja kulturhámi. Juolludeamit gusket prošeavttaide mat leat ožžon doarjaga borgemánu rájes dán rádjai.

Ole-Henrik Bjørkmo Lifjell (NSR) Inger Elin Utsi (Sámediggi)

– Sámediggi doarju dáid prošeavttaid ovddidan dihtii min giela ja kultuvrra. Prošeavttat mat čalmmustahttet sámi dáidaga ja kultuvrra leat áibbas deaŧalačča min immateriála kulturárbbi suodjaleapmái ja viidáseappot gaskkusteapmái, dadjá sámediggeráđđelahttu Ole-Henrik Bjørkmo Lifjell (NSR).

Prošeavttat maid Sámediggi doarju:

• Museene I Sør-Trøndelag AS oažžu gitta 60 000 ruvnno láiggohit dáiddačájálmasa “Mov gïele” Rørosmuseet:ii. Sii háliidit loktet ja čalmmustahttit sámi dálá dáidaga ja bidjat fokusa kultuvrii ja gillii.
• Oslo Domkirkes Sokn: 66 000 ruvnno lágidit Samisk festuke 2026 Oslos. Sii háliidit ásahit jahkásaš sámi ávvovahku Sámi álbmotbeaivvi oktavuođas.
• Yggdrasil Teater Tråante AS: 40 000 ruvnno teáhterbihttá lágideapmái gos okta neavttár hállá lullisámegiela. Ulbmil lea ráhkadit oktasaš kultuvrralaš referánssa guovllu mánáide ja rávisolbmuide muitalusain mii guoimmuha ja boktá sáhkkiivuođa mytologiija ja lullisámegiela hárrái.
• Stájgu suohkan oažžu gitta 30 000 ruvnno “Arven i Nordøst” prošektii, mii musihkalaš čájálmas mátkki ja árbedieđu birra. Sii háliidit boktit dihtomielalašvuođa ja rámisvuođa sámi kultuvrra ja historjjá ektui.
• Ellida AS: 60 000 ruvnno sámi kultuvrra čalmmustahttimii dán jagáš Arctic Moving Image & Film Festival oktavuođas skábmamánus, gos fáddá lea “Verddevuohta, ein samtale”.
• Finnmark Filmproduction AS: 85 000 ruvnno buvttadit “Noaidi” nammasaš oanehisfilmma.
• Hemnes Umesamiske Forum: 10 000 ruvnno čájehit sámi geavahandáidaga ja juohkit dieđuid Ubmisámi giellaguovllu birra.
• Várjjat Musea: 25 000 ruvnno bidjat čájálmasa Várggáid sámiid birra, mas leat golbma váldosuorggi: arkeologalaš gávdnoštumit, Várjjat sápmelaččat aktevran báikegottis ja leamen sápmelaš Várggáin dál.
• Suodjalus: 47 000 ruvnno bálkkáhit sámi artistta ja láidesteaddji ávvukonsertii Hæren musihkkakorpsain Hársttáin sámi álbmotbeaivvi oktavuođas 2026:s.
• MILLA ENTERTAINMENT Camilla Therese Karlsen: 80 000 ruvnno mátkkoštit Ruonáeatnamii Hidden Path nammasaš čájálmasain, mii lea mearrasámi heahpatvuođa birra assimilerema maŋŋá. Ulbmil lea háhkat ságastallama dáiddáriid ja nuoraid gaskkas assimilerema, heahpatvuođa ja iešsoardima birra.
• Valdresspelet oaččui 60 000 ruvnno bálkkáhit sámi neavttáriid “Dronningemne” teáhterbihttái.
• Láhpoluoppal Gilisearvi oaččui 45 000 ruvnno lágidit kulturbeaivvi Láhpoluobbalis.
• Innlandet Fylkkasuohkan oaččui 20 000 ruvnno lágidit hutkás arena nationála unnitlohkoálbmogii ja eamiálbmogii, Silppufestivála Innlandet suohkanis.
• Geir Tore Holm oaččui 18 100 ruvnno lágidit duodji bargobáji Katarina Spik Skum:ain Sørfinnset skuvllas.
• Trondheim Middelalderfestivalen oaččui 70 000 ruvnno bálkkáhit sámi artisttaid ja kulturbargiid gaskkustit sámi kultuvrra festiválas.
• Skarsvåg Bygdelag oaččui 40 000 ruvnno gaskkustit sámi kultuvrra jahkásaš riemuin Verdens Nordligste Festival.
• Bugøynes Festival oaččui 40 000 ruvnno bálkkáhit sámi artistta Bugøynesfestivalen 2025.
• Tromsø Barnefestival AS oaččui 200 000 ruvnno “Mánáid jienat” prošektii, mas guokte máná ožžo festiválajođiheaddjirolla ja jođiheigga festivála earret eará sámegillii.
• Olavsfestdagene i Trondheim oaččui 96 000 ruvnno bálkkáhit sámi artisttaid čuojahit riikkaidgaskasaš dáiddaprošeavtta oktavuođas Olavsfeasttas.