Mikkel Eskil Mikkelsen Árvu, Sámediggi

Sikku Media oažžu 300 000 ruvnnu doarjaga sámediggeráđis ráhkadit spealloapplikašuvnna davvisámegillii mii lea «cuige ja deaddil» speallu.

Lea John Anders Sikku gii eaiggáduššá SIKKU MEDIA fitnodaga mii lea Deanus.

Mihttun dáinna ođđa spealuin lea addit mánáide ja nuoraide vejolašvuođa speallat sámegillii. Spealus  stuorra oassi muitalusas boahtá ovdan dialogaid bokte, muhto maiddái muđuid govaid ja jiena bokte.

Galgá vejolaš válljet vearbbaid maid speallokaraktevra sáhttá bargat nugo vázzit, hoigat, loktet, rahpat ja giddet. Spealu čađaheami bokte ferte váldokaraktevra veahkehit ollu olbmuid vai beassá ovdánit spealus.

Spealu muitalus lea olbmo birra gii fillejuvvo vuolgit buotdiehtti jiehtanasa lusa ja su mátkkis son ferte veahkehit ollu olbmuid geain leat iešguđetge váttisvuođat vai beassá ovdánit spealus. Mađi eanet váttisvuođaid spealli čoavdá dađi eanet čuoggáid oažžu.

Sámedikki strategiija lea loktet sámegiela mánáid ja nuoraid gaskkas ja sámediggeráđi Mikkel Eskil Mikkelsen (NSR) mielas leat dákkár digitála spealut dehálaččat.

– Lea dehálaš doarjut dákkár prošeavttaid mas ráhkadit eanet sámegielat applikašuvnnaid ja spealuid. Dáinna ođđa applikašuvnnain de leat veahkkin loktemin sámegielat mánáid ja nuoraid giellageavaheami ja beroštumi. Mađi eanet mánát ja nuorat besset speallat sámegillii dađi buoret dat lea giellamovttiidahttimis, dadjá Mikkelsen.

Doarjja juolluduvvo: Giellaovddidandoaimmat doarjjaortnegis.

Gažaldagaid vástida dahje jearahallama addá sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no