Goađi ceggejit Romssavággái, gos Ruoŧa beale boazosámit orro gesiid jagi 1939 rádjái. Sin veagaid maŋisboahttit leat mielde proseassas, ja árbevirolaš sámi huksenvierut leat dehálaččat das. Goađi ceggen dokumenterejuvvo vai dan sáhttá čájehit oahpahusas ja gaskkusteamis. Dasa lassin dohko ceggejit šilttaid main leat dieđut Romssavákki sámi kulturmuittuid birra.

Sámediggeráđđi Runar Myrnes Balto (NSR) deattuha man dehálaš prošeakta lea:

– Prošeakta veahkeha oainnusmahttit Romssavákki sámi historjjá ja dahká ahte ođđa buolvvat besset oahppat sámi huksenvieruid ja eallinvuogi birra. Sámediggi lea ilus go beassá doarjut prošeavtta mii nanne sámi kultuvrra ja gullevašvuođa guovlluin mat leat gávpogiid lahka.

Prošeavtta ollislaš rámma lea 1,2 miljovnna ruvnno. Romssa suohkan máksá 400 000 ruvnno iežasoasi, Troms Holding 200 000 ruvnno ja 200 000 ruvdno rehkenastojuvvo iežas bargun. Goađi ceggemii adnojuvvo eanemus ruhta, muhto ruhta adnojuvvo maiddái dokumenteremii, šilttaid ceggemii ja sámi historjjá gaskkusteapmái.

Doarjja juolluduvvo regionála ovdánahttinprošeavttaid doarjjaortnegis.