– Sámi festiválat leat dehálaš arenat ja lasihit orrunmovtta ja loktejit barggahusa. Sámediggi háliida veahkehit go BeskánLuossaRock pláne ovdánahttit festivála, dadjá sámediggeráđđi Maja Kristine Jåma (NSR). 

Ruhta maid festivála oažžu boahtá ohccánvuđot doarjaga bokte “Ásahusovdáneapmi”. Festivála oažžu maiddái doarjaga jahkásaččat Sámedikki bušeahta bokte ja doarjja addá ekonomalaš einnostahttivuođa. Festiválas, mii lágiduvvo Kárášjogas, lea 10-jagiávvudeapmi 2025:s ja stuorámus mihttu lea sámi musihka- ja kulturvásáhusaid fállat ja dahkkát olahahtii gehččiide. 

– Ruhta maid mii juolludat dál galgá veahkkin nannet festivála ja ovdánahttit doaimmahusa ođđa konseptii, muhto lihkká oktiivástideaddji sámi luohte- ja musihkkaberoštupmái. Mii sávvat festiválii lihkku plánaiguin ja ávvudemiin, dadjá Jåma.

BeskánLuossaRock birra

BeskánLuossaRock álggahuvvui 2014 ja lei oassin jahkásaš luossaoaggungilvvus man Beskenjárgilisearvi Kárášjogas lágidii. Oaggungilvu heaittihuvvui gáržžidemiid geažil. 2014:s stuoriduvvui festivála guovtti beaivái mas liige beaivi várrejuvvon mánáide ja nuoraide. Festivála sirde maiddái Kárášjoga márkanguovddážii vuoi šaddá olámuttos báikkálaš gehččiide.