Sámediggi lea juolludan lagabui 3 000 000 ruvnno máŋga iešguđet musihkkaprošeavttaide luohti ja sámi musihkka doarjjaortnega čađa. Doarjja galgá veahkkin ollašuhttit valljivuođa musihkkaprošeavttaid miehtá sámi. 

Luohti ja sámi musihkka doarjjaortnega bokte lea Sámedikkis mihttun ahte sámi musihkkárat ja artisttat ovddidit ja buvttadit luođi ja sámi musihka. Obbalaččat lea juolluduvvon 2 977 766ruvnno doarjjan 22 prošektii 26.03.–15.07.2026 áigodagas.

- Luohti ja sámi musihkas lea guovddáš sadji min kultuvrras ja identitehtas. Dáid juolludemiid bokte mii leat mielde nannemin sihke árbeguoddiid ja ođđa jienaid sámi musihkas, dadjá sámediggeráđđi Jon-Christer Mudenia.

Vuoruhit viidodaga ja kvalitehta

Sámi musihkka ja luohti leat dehálaš sámi giela ja kultuvrralaš ovdanbuktimiid fievrrideaddjit. Doarjjaortnega bokte váikkuha Sámediggi dasa ahte dat ovddiduvvojit, geavahuvvojit ja gaskkustuvvojit boahtte buolvvaide. Ulbmilaš vuoruhemiiguin láhčá Sámediggi saji sihke árbevirrui, ođđabuvttadeapmái ja eanet riikkaidgaskasaš oainnusmahttimii sámi musihkas.

Prošeavttat mat leat ožžon doarjaga čájehit sámi musihkkaeallima viidodaga, árbevirolaš luođis ođđaáigásaš buvttadusaide ja riikkaidgaskasaš ovttasbargui. Viiddes ortnet váikkuha sihke rekrutterema, fágalašvuođa ja oainnusmahttima sámi musihkkii riikkadásis ja riikkaidgaskasaččat.

– Juolludeamit čájehit girjáivuođa sámi musihkkasuorggis, sihke ovdanbuktima, šáŋŋeriid ja ulbmiljoavkkuid dáfus. Sámediggái lea deaŧalaš láhčit dili dán viiddisvuhtii ja sámi musihka ovdáneapmái, dadjá Mudenia

Ovdamearkkat juolludemiin

Doarjjaoažžuid gaskkas mii gávdnat sihke sajáiduvvon ja ođđa aktevrraid, geat leat ožžon doarjaga iešguđetlágan prošeavttaide. Prošeavttaid gaskkas mat ožžot doarjaga leat ARVVAS joavkku gierdomátki ja riikkaidgaskasaš áŋgiruššan, musihkkavideo buvttadeapmi Kari Heimena luođi Áhkku várás, Ella Marie Hætta Isaksena bargu buvttadit iežas nuppi skearru, ja artista- ja jođihanovddideapmi artisttaide Elina Ijäs ja AILO.

– Mii oaidnit stuora áŋgiruššama sámi musihkkáriid ja artisttaid gaskkas. Doarjjaortnega bokte mii veahkehit láhčit dili ovdáneapmái, rekrutteremii ja profešonaliseremii suorggis. Lea erenoamáš suohtas oaidnit movt prošeavttat ovttastahttet árbevieru ja innovašuvnna. Dát lea mearrideaddjin sámi musihka ovdáneapmái ja dasa ahte olahit eanet olbmuid dainna, dadjá Mudenia.

Geat leat ožžon doarjaga