– Dat ahte njunuš politihkkár lea diekkár duođalaš rohcošanáššis mielde, čuohcá garrasit buohkaide su birrasis, sihke Sámedikkis ja muđui maid. Dát ášši čuohcá olles servodahkii. Dál fertet mii atnit fuola nubbi nuppis, dadjá Muotka.

Leat oallugat geat dárbbašit čuovvoleami, ja danne Sámediggi lea ásahan sierra heahtejoavkku man sámediggepresideanta jođiha.

– Mii leat álggahan viiddis doaimmaid iežamet bargiid áimmahuššama dihte. Munnje lea dál deháleamos ahte mii gieđahallat ášši nu ahte vuhtiiváldit sihke Sámedikki integritehta ja sámi servodaga luohttámuša, dadjá Muotka ja lasiha;

– Áššis, man politiijat leat dutkame, lea sáhka kriminála daguin mat sakka leat suorggahan mu. Dat ii oro dego duohta, ja mun dovddan šohka, dorvvohisvuođa ja morraša. Dakkár dagut leat áibbas dohkketmeahttumat ja rihkkot árvvuid mat mis Sámedikkis ja sámi servodagas leat, dadjá Muotka. 

Son muittuha ahte juohke mánáid illasteami gova duogábealde lea gillájeaddji.

– Dat lea dat mii dahká dákkár govaid juohkima nu duođalažžan, dadjá Muotka.