Mikkel Eskil Mikkelsen Vaino Rensberg, Sámediggi

Vuosttaš sámi giellaguovddážat, Porsáŋggus ja Gáivuonas ásahuvvojedje 1994. Dál leat 18 giellaguovddáža miehtá Norgga, Oslos máddin gitta Unjárgii davvin, ja Sámediggi lea giellaguovddážiid váldoruhtadeaddji.

Maŋemuš jagiid lea Sámediggi juolludan doarjagiid giellaguovddážiidda nu ahte sii sáhttet čađahit giellagurssaid, giellaarenaid ja lágidit doaimmaid giellavahkus. Muhtin giellaguovddážat leat ožžon doarjaga báikenammabargguide.

Muhtin giellaguovddážat dorjot mánáidgárddiid geavahit sámegiela ja soames giellaguovddážat háliidit bargat sámi árbevirolaš máhtu ja báikkálaš sámi kultuvrra nannemiin.

Sámedikki dievasčoahkkin mearridii giellaguovddážiid dálá strategiija 2015, ja máŋggat dilálašvuođat leat rievdan dán rájis. Giellaguovddážiid lohku lea lassánan, ođđa hástalusat leat ihtán ja teknihkalaš ovdáneapmi lea buktán ođđa vejolašvuođaid.

– Sámediggeráđđi háliida lagas ovttasbarggu giellaguovddážiiguin go dál galgat dihkkadit luotta boahtteáigái, lohká sámediggeráđđi Mikkelsen.

Son deattuha ahte giellaguovddážat leat guovddáš aktevrrat rávisolbmo oahpahusas miehtá Sámi, ja lohká ahte mihttun lea ovdánahttit dán doaimma. Dán oktavuođas lea giellaguovddážiid fágalaš ovdáneapmi ja gelbbolašvuođalokten dehálaš.

Mikkelsen lohká ulbmilin strategiija ođasmahttimiin lea maid gávnnahit makkár doaimmaid, earret giellaovdánahttin bargguid, Sámediggi galgá ruhtadit.

– Lea maid dárbu geahččat galgetgo buot giellaguovddážat bargat seamma bargguid, vai galgágo Sámediggi diŋgot iešguđetlágán bargguid guđege giellaguovddážiin, loahpaha Mikkelsen.

Giellaguovddážiid strategiija ođasmahttima vuođđun lea Sámedikki giellastrategiija - Giellalokten, man Sámedikki dievasčoahkkin mearridii juovlamánus 2018, ja sámediggeráđi Beaiveálgu-julggaštus (2021-2025): «Ovttasbargoguoimmit dáhttot sámi giellaguovddážiidda ovdánanvejolašvuođaid, ja nannet daid guovddáš aktevran rávisolbmuid- ja joatkkaoahpahusas».

Sámedikki giellastrategiija ođasmahttin bargu álgá čakčat 2023.