Guolástusministtar Marianne Sivertsen Næss dieđihii mannan vahkus ahte son ásaha bargojoavkku mii galgá guorahallat turistabivddu, maŋŋel go medias bođii ovdan ahte olu guolli suollemasat fievrreduvvo eret riikkas.

– Sámediggeráđđi lea hui ilus go guolástusministtar bidjá johtui doaimmaid. Mii doarjut dán barggu ja háliidivččiimet nammadit muhtima bargojovkui, dadjá sámediggepresideanta Silje Karine Muotka. – Lea áibbas čielggas, ahte ii leat kontrolla turistabivddus.

– Mii diehtit ahte dorskeearit njidjet, ja dalle lea erenoamáš dehálaš ahte min ruovttuguolásteaddjit vuoruhuvvojit. Sis geat orrot lagamusas resurssaid galggašii leat stuorámus riekti. Go nálli lea njiedjan, de fertet mii vuoruhit riddoguolásteddjiid eat ge galledeaddji guolásteddjiid, dadjá sámediggepresideanta.

Mediat leat almmustahttán ahte oassi dan nu gohčoduvvon turistabivddus orru leamen organiserejuvvon joavkkut mat dolvot stuora hivvodagaid guollefileaid eret riikkas, muhto ahte reasta guolis bálkestuvvo.

– Ii sáhte leat nu ahte biebmu billistuvvo dáinna lágiin, dat lea eahpeehtalaš, dadjá Muotka.