Maja Kristine Jåma Åse M. P. Pulk/Sámediggi

Lea vuođđudus Sámi Musihkkafestivála mii lea ožžon 92 000 ruvnnu doarjaga ođđasit báddet luđiid ja lávlagiid maid Simmona Máhte lea ráhkadan. Báddemat leat digitála hámis.  Emil Karlsen, Jan Ole Hermansen ja Dear Sara leat mielde dán musihkkaprošeavttas.

Permafrost Production oačču ges 195 000 ruvnnu doarjjan buvttadit skearru elektronika-joavkkuin man namma lea TØNDRA. Dán anonyma joavkkus leat guokte čuojaheaddji ja soai viežžaba inspirašuvnna luođis ja sámi musihkas. TØNDRA mihttun lea olahit viidábut iežaska musihkain, maiddái olgoriikkas. 

– Sámi musihkkasuorggis leat dál ollu doaimmat. Sámi musihkkárat ja lávlut buvttadit musihka máŋgga šlájas dahje suorggis. Sámediggeráđi mielas lea buorre go musihkkasuorggis lea ná viidodat, sihke sámi klassihkkárat ja ođđamállet šuoŋat. Goappaš prošeavttat maidda dál juolludeimmet doarjaga, dat leat sihke ođđaáigásaš ja árbevirolaš musihkka, lohká sámediggeráđđi Maja Kristine Jåma (NSR).

Juolludeapmi addo doarjjaortnegis juoigan ja sámi musihkka. 

Jos háliidat jearahallat, de váldde oktavuođa  Maja Kristine Jåma tel: +47 47 24 23 66, e-post: maja.kristine.jama@samediggi.no