Norgga ohcci lea Mátta-Várjjat gielda, mii galgá čađahit prošeavtta ovttas Anára suohkaniin Suomas. Dasa lassin leat olu eará oassebealit geat leat mielde prošeavttas.

— Sámedikki bajimuš mihttu lea ahte sihke nuortalaš giella ja kultuvra dohkkehuvvo ja ealáskahttojuvvo norgga-beale Sámi. Golggotmánus mearridii Sámedikki dievasčoahkkin ahte galgat riikkarájiid rastá álggahit ovttasbarggu, ja ahte aktiivvalaččat ráhkadahttit nuortalaš giellabirrasa Mátta-Várjjagii, lohka sámediggeráđđi Mikkel.

Interreg lea EO-prográmma mii galgá nannet ovttasbarggu riikkarájiid rastá. Sámi organisašuvnnat Norggas sáhttet ohcat doarjaga ovttasbargoprojeavttaide ruoŧa dahje suoma organisašuvnnaiguin Interreg Aurora ortnegiid bokte.

Norgga ohcciide ruhtada Interreg gitta beali prošeaktagoluiguin, ohccit fertejit háhkat loahppabeali eará sajiin. Váikkuhan dihte eambbo sámi Interreg-prošeavttaid lea Sámediggi várren doarjjaruđaid prošeavtta iežasoasi máksimii.

Mátta-Várjjat gielda áiggošii dál álggahit ovdaprošeavtta mii galgá plánet stuorit prošeavtta ovddidit nuortalaš giela ja kultuvrra. Nuortalaš giella ja kultuvra lea hui rašes dilis, unnán giellageavaheddjiiguin bieđggus máŋggaid riikkain. Leat 10 giellageavaheaddji norggabeale dál, buohtastahtton suomain gos leat 300 aktiivvalaš giellageavaheaddji. Čoavdin dihte hástalusaid mat nuortalaš gielas ja kultuvrras leat , dárbbašuvvo ovttasbargu riikkarájiid rastá. Dán prošeavtta bargoguoibmevuohta árvvoštallo rievttes vuohkin bargat nuortalaš giela ja kultuvrra ovddidemiin.

— Mihttu lea nannet nuortalaš giela iešguđetlágan kulturfálaldagaid bokte, ja ásahit aktiiva giellabirrasiid sihke mánáide ja rávisolbmuide. Sámediggi háliida ahte nuortalaš báikenamat adnojit almmolaččat, ja ahte Ä’vv Saa’mi mu’zei/ Äʹvv nuortalaš musea nannejuvvo ja šaddá dehálaš institušuvdnan nuortalaš gillii, dadjá Mikkelsen.