Silje Karine Muotka Árvu/Sametinget

Dát golbma fitnodaga leat golmma iešguđet báikkis Sámedikki doaibmaguovllus.

Finnmarksløpet AS 

Finnmarksløpet AS lea ožžon 100 000 ruvnnu doarjaga Finnmarksløpet 2023 čađaheapmái. Fitnodat lea Álttá suohkanis. Doaimma ulbmil lea Finnmarksløpet-gilvvu bokte boktit rámisvuođa, ássanmovtta ja beroštumi riikkaosiide, ja erenoamážit deattuhit sámi kultuvrra.

– Finnmarksløpet lea lágideapmi mii čatná Finnmárkku oktii, ja lea dehálaš ahte gilvu ovttasbargá boazodoaluin ja eará sámi beroštumiiguin go gilvvus olles apparáhtain ja 1000 beatnagiin vudjet boazodoalloguovlluid čađa. Dát bargu geatnegahttá, ja lea dehálaš váikkuhit dasa, dadjá sámediggepresideanta Silje Karine Muotka (NSR). 

Innlandet fylkeskommune 

Innlandet fylkkasuohkan lea ožžon 100 000 ruvnnu doarjaga prošektii «Økt fokus på rasisme». Prošeavtta ulbmil lea eastadit cielaheami ja rasismma sámiid vuostá. Dát lea Innlandet fylkkasuohkana, Sørsamisk Forum ja Sámedikki gaskasaš ovttasbargoprošeakta.

– Lea buorre go Innlandet fylkkasuohkan bargá rasismma eastademiin sámiid vuostá, ja maiddái cielaheami, vaššicealkámušaid ja vuortnuheami vuostá. Dat lea dehálaš ja mávssolaš midjiide buohkaide oaivvilda sámediggepresideanta. 

Romssa Riikkaidgaskasaš Filbmafestivála (TIFF) 

Romssa Riikkaidgaskasaš Filbmafestivála (TIFF) - vuođđudus lea ožžon 200 000 ruvnnu doarjaga prošektii mii deattuha sámi giela, kultuvrra ja aktivismma. Fitnodat lea Romssa suohkanis. Prošeavtta ulbmil lea nannet Romssa riikkaidgaskasaš filbmafestivála sámi perspektiivva ja álgoálbmotperspektiivva. Dan dahket sámi álggahanfilmmain, ja go deattuhit davviguovlluid álgoálbmogiid ja erenoamážit sámi kultuvrra ja giela.

– TIFF lea dehálaš sadji álgoálbmotfilmmaide, ja lean movttet go sáhttit váikkuhit dasa ahte álgoálbmotfilmmat ja sámi filmmat ožžot lunddolaš saji TIFF prográmmas, dadjá Muotka.

Doarjagat juolluduvvojit regionála ovddidanprošeavttaid doarjjaortnegis.

Jus leat gažaldagat dahje jus háliidat jearahallat, váldde oktavuođa sámediggepresideanttain Silje Karine Muotkain , tlf. +47 984 87 576, silje.karine.muotka@samediggi.no