Sámediggi lea okta dan 15 njunuš fitnodagas ja servodataktevrras mainna máilmmimeašttirgilvvut strategalaččat ovttasbarget lágideami dáfus. Dainna lágiin beassá Sámediggi leat mielde sihke pláneme ja čađaheame lágidemiid. Dat golbma davimus fylkkasuohkana leat maid mielde ovttasbarggus. 

- Sámediggi oažžu dál vejolašvuođa oainnusmahttit sámi kultuvrra, historjjá ja servodateallima sihke ovdal lágidemiid ja lágidemiid áiggi. Dat sáhttá addit buoret vuođu lágideaddjái gaskkustit riikaoasi sápmelaččaid birra olles máilbmái, dadjá sámediggeráđđi Paul Bendikk Jåma. 

Dá ii leat sponsorprográmma, muhto fierpmádat mas leat ealáhusjođiheaddjit ja mearrideaddjit geat árrat besset leat mielde hábmeme prošeavtta. Ovttasbarggu tihttel lea N29 Next, ja dat galgá leat arena ovttasbargui, gelbbolašvuođa juogadeapmái ja vuolggahemiide mat buktet gelbbolašvuođaloktema, árvohuksema, ođđa čovdosiid, riikkaidgaskasaš fuomášumi ja guhkesáigásaš oalgeváikkuhusaid Davvi-Norgii. 

- Mii illudit ain ovttasbargat MM-gilvvuiguin mat leat Áhkánjárggas 2029:s, ja mii áigut bargat dan ovdii ahte sámi kultuvra, historjá ja servodateallin eai ovddiduvvo ja čalmmustahttojuvvo dušše juste dalle, muhto maiddái maŋŋel lágidemiid, dadjá Paul Bendikk Jåma.