Dán mearrádusa dagai politihkalaš virgáibidjanráđđi Sámedikkis geassemánu 24. b..
– Lean ilus oažžut Sten Olav Heahtta ja Liss-Ellen Ramstad jođihanjovkui. Soai buktiba deaŧalaš gelbbolašvuođa ja vásihusa mii nanne Sámedikki boahttevaš barggu. Mun illudan buori ovttasbargui ja lean oadjebas dasa ahte soai váikkuheaba dasa ahte Sámediggi šaddá ain čielgaseabbo ja áigeguovdileabbo aktevran sámi servodagas ja gulahallamis nationála ja riikkaidgaskasaš ovttasbargoguimmiiguin, dadjá Sámedikki direktevra Inger Marit Eira-Åhrén.
Sten Olav Heahtta (60) lea leamaš konstituerejuvvon ossodatdirektevran sámi kulturbirrasa, areála, luonddu ja oktasaš vuoigatvuođaid ossodagas. Ossodagas leat 32 bargi ja guokte juhkosa. Son illuda joatkit barggu sámi vuoigatvuođaid nannemiin ja ovddidemiin.
– Lean ilus go oaččun vejolašvuođa dustet daid hástalusaid mat ossodagas leat - erenoamážit barggu ođđa kulturmuitolága implementeremiin boahttevaš sámi kulturmuitohálddašeamis. Eará hástalus lea váldit vára sámi kultuvrras ja sámi ealáhusain areálasisabahkkemiid oktavuođas maid Fápmolokten Finnmárku sáhttá mielddisbuktit.
Liss-Ellen Ramstad (45) lea leamaš konstituerejuvvon doaibmastivrema ja servodatoktavuođa stába virggis ođđajagimánu rájes ja son lea guhká bargan Sámedikkis. Son lea maid leamaš Duohtavuođa- ja soabahankommišuvnna čállingotti jođiheaddji. Son oažžu ovddasvástádusa strategiijas, doaibmastivremis, digitaliseremis, bušeahtas, analysas ja servodatoktavuođas. Stábas leat 8 virggi.
– Lean giitevaš luohttámuša ovddas ja illudan joatkit barggu stábajođiheaddji rollas. Mun áiggun bargat dan ovddas ahte nannet rabasvuođa, koordinerema ja buori gulahallama - sihke siskkáldasat ja min ovttasbargoguimmiiguin, dadjá Ramstad.
Sámedikki hálddahus organiserejuvvui ođđasit ođđajagimánu 1. b. 2025 ja das leat dál guokte stába ja vihtta ossodaga. Oktiibuot leat Sámedikkis 155 bargi.
Jođihanjoavkkus leat dát:
- Inger Marit Eira-Åhrén, direktevra
- Liss-Ellen Ramstad, doaibmastivrema ja servodatoktavuođa stába jođiheaddji
- Inger Elin Utsi, gulahallanstába jođiheaddji
- Tommy Somby, hálddahusossodaga direktevra
- Rávdná Buljo Gaup, politihkalaš čállingoddi direktevra
- Sten Olav Heahtta, sámi kulturbirrasiid, areála, luonddu ja kollektiivvalaš vuoigatvuođaid ossodaga direktevra
- Magne Svineng, ealáhusovdánahttin, njuolggodoarjja- ja kultuvraossodaga direktevra
- Risten Turi Aleksandersen, sámi giela, dutkama, oahpahusa ja álbmotdearvvašvuođa ossodaga direktevra