Dat mielddisbuktá stuora loktema ja erenoamáš nannema SVL hálddahuslaš kapasitehtas. Oktiibuot árvaluvvo ahte SVL:i addojuvvo 4,661 miljovnna ruvnno Sámedikki 2024 bušeahtas.

– Lean nu ilus go Sámediggi sáhttá váikkuhit dasa ahte šaddá eanet valáštallandoaibma ja valáštallanillu. Buoret ruhtadeapmi SVL:s lea njuolga mielde nanneme ja ovddideame sámi valáštallama, ja mun giittán SVL konstruktiiva šiehtadallamiin, dadjá sámediggeráđđi Maja Kristine Jåma (NSR).

Sámediggi ja Sámi Valáštallan Lihttu (SVL) vuolláičáliiga vuosttaš geardde valáštallanšiehtadusa 2022 juovlamánus. Valáštallanšiehtadus mielddisbuktá geatnegasvuođaid šiehtadusa vuoruhansurggiid čuovvoleamis, earret eará sámi valáštallansurggiid ovddideamis ja ealáskahttimis, rekrutteremis, ovttasbarggus sámevaši vuostá, gulahallan iešguđet hálddašanlađđasiiguin ja relevántta aktevrraiguin, lassin šiehtadusinstituhttii.

Sámediggi ja SVL leat maid ovttas bargan Kultuvra- ja dásseárvodepartemeantta ektui oainnusin dahkat dárbbu vuoruhit sámi valáštallama ja lasihit speallanruđa. Ovttasbarggu boađusin lea ahte speallanruđat mat galget lasihit doaimmaid leat duppalastojuvvon, ja ođđa ulbmilčilgehus mii galgá bisuhit ja viidásetfievrredit sámi valáštallama oassin sámi kultuvrras, gielas ja identitehtas. Dát čielggai álggu geahčen miessemánu ja mielddisbuktá ahte SVL ollislaččat sáhttá geavahit speallanruđa, maid ovdal ii leat sáhttán.

Loga Valáštallanšiehtadusa (PDF, 103 kB)