Vaikke váldooassi doaibmabijuin Sámedikki doaibmaplánas veahkaválddi vuostá 2023-2025 leat čađahuvvon dahje čuovvuluvvon eará proseassain, de leat ain suorggit mat fertejit čuovvuluvvot viidáseappot. 

Evalueren čájeha ahte bargu veahkaválddi eastadeamis ain gáibida mearrediđolaš áŋgiruššama, nannejuvvon ovttasbarggu ja eanet gelbbolašvuođa sámi gielas ja kulturáddejumis. Dat čujuhuvvo maiddái dasa ahte mánát ja nuorat vásihit máŋggalágan veahkaválddi máŋgga arenas, ja ahte lea dárbu eanet fuomášumi bidjat digitála veahkaválddálašvuhtii. 

Ann-Elise Finbog Árvu/Sámediggi

– Veahkaváldi čuohcá ovttaskas olbmuide, bearrašiidda ja olles servodahkii. Lea mearrideaddji ahte veahkkefálaldagat, eastadeapmi ja diehtojuohkin lea olámuttus ja heivehuvvon sámegielaide ja sámi servodatdilálašvuođaide, dadjá sámediggeráđđi Ann-Elise Finbog (SáB).

Sámediggeráđđi čujuha dasa ahte digitála veahkaválddálašvuohta ja vuortnuheapmi lea dađis oassin hástalusain. Dasa gullet earret eará ahte govaid juhket vaikke eai leat miehtan dasa, sávakeahtes oktavuohta ja loavkašuhttimat neahtas. Deattuhuvvo ahte lea dárbu nannet eastadeami ja gelbbolašvuođa dán suorggis.

– Ain lea dárbu ovdánahttit ja nannet sámi giela ja doahpagiid mat gullet rupmašii, seksualitehtii ja mieđiheapmái. Go váilot doahpagat, de sáhttá leat váttis hállat daid fáttáid birra, erenoamážit mánáide ja nuoraide, dadjá sámediggeráđđi Finbog (SáB).

Sámediggeráđđi deattuha man deaŧalaš lea oainnusmahttit ja dáistalit veahkaválddi sámi servodagas máhttohuksema, rabasvuođa ja kulturvuođđuduvvon doaibmabijuid bokte. 

Bargu veahkaválddi vuostá gáibida viiddis ovttasbarggu, ja sámediggeráđđi áigu joatkit ja nannet ovttasbarggu guovddáš eiseválddiiguin, gielddaiguin ja eaktodáhtolaš organisašuvnnaiguin sihkkarastin dihtii ollislaš ja olahahtti doaibmabijuid miehtá Sámi.

Ášši meannuduvvo Sámedikki dievasčoahkkimis duorastaga geassemánu 18. beaivvi. 

Loga dievasčoahkkin ášši dáppe:

Sámedikki doaibmaplána veahkaválddi vuostá - raporteren ja čuovvoleapmi.