Jon-Christer Mudenia Åse M.P. Pulk/Sámediggi

Sámediggeráđđi evttoha bargat dan ala ahte oažžut sadjái ođđa hálddašanmálle ruoššaluosaid várás, mii sáhttá addit sihke mearraluossabivdiide ja johkasámiide vejolašvuođa ávkkástallat dán resurssas.

– Ferte ásahit stáhtalaš doarjja- dahje buhtadusortnega mii ollásit gokčá goluid investeremiid oktavuođas mat dárbbašuvvojit ođđa reaidduid háhkamii, dadjá sámediggeráđđi Jon-Christer Mudenia (NSR).

Lávdegoddečoahkkimiid oktavuođas bidjá sámediggeráđđi ovdan raportta mearrasámiid guolástanvuoigatvuođaid birra árbevirolaš sámi ássanguovllus, semináras gaskavahku guovvamánu 25. b.

– Lea vealtameahttun ahte mearrasámi vuoigatvuođat guolásteapmái mearas nannejuvvo lágas. Raporta lea deaŧalaš oassi Sámedikki barggus dáinna, dadjá Mudenia.

Nubbi eará deaŧalaš ášši sámediggeráđđái lea sihkkarastit duohta vejolašvuođaid lotnolasat bargat guolástemiin ja eanadoaluin.

– Mii áigut bargat rievdadit njuolggadusaid nu ahte variašuvnnat sisaboađuin guolásteamis váldojuvvojit vuhtii. Lea deaŧalaš ahte olmmoš ii masse vuoigatvuođa oažžut guolásteami váldoealáhussan, vaikko sisaboahtu eanandoalus ovtta jagis dagašii eanet go 33 proseantta ollislaš sisaboađus, lohká Mudenia.

Sámediggeráđđi evttoha maid rievdadit njuolggadusaid nu ahte guolásteaddji gii maid bargá eanandoaluin ii hehttejuvvo geavaheames dárbbašlaš áigodatbargiid eanandoalus.

Áššis gieđahallá sámediggeráđđi maiddái viidáset barggu álgoálbmotoassálastima birra Riikkaidgaskasaš mearradutkanráđis (ICES).

– Dat ahte álgoálbmogat álget searvat ICES:ii lea hui mávssolaš, daningo ICES:s lea váikkuhanfápmu guolástushálddašeapmái ja bivdoeriide sámi guovlluin, lohká Mudenia.

Ášši “Mearraresursahálddašeapmi sámi guovlluin 2026” meannuduvvo Sámedikki ealáhus- ja kulturlávdegottis boahtte vahkus ja loahpalaččat Sámedikki dievasčoahkkimis gaskavahku njukčamánu 11. beaivvi.

Loga áššeovddidusa (dárogillii): Sak 010/26 - Marin ressursforvaltning i samiske områder 2026