– Plánas ovdanbuktojuvvojit strategiijat dasa movt Sámediggi vuoruha vai sihkkarastá ja ovdánahttá sámi oahpponeavvohálddašeami, dadjá sámediggeráđđi Maren Benedicte Nystad Storslett (NSR).

Dáčča ohppiin lea oahpahuslága vuođul vuoigatvuohta oažžut oahpponeavvuid girjedárogillii dahje ođđadárogillii. Sámi ohppiin ii leat dál seammalágan lágas nannejuvvon vuoigatvuohta oažžut oahpponeavvuid sámegillii.

– Mii áigut ain ovddidit dárbbu oažžut lasihuvvon rámmajuolludemiid ráđđehusas. Sámedikkis lea gáržžes ruhtadilli. Danne mii vuosttažettiin árvalit vuoruhit oahpponeavvuid fágaide maidda Sámedikkis lea váldi mearridit oahppoplánaid. Dat mearkkaša sámegielfágaid ja sierra sámi fágaid joatkkaskuvlla oahpahusas, dadjá Nystad Storslett.

Dá leat evttohuvvon strategiija váldočuoggát:

Sámediggi háliida:

• ahte sámegiel oahpponeavvut speadjalastet miehtasámi perspektiivva
• fuolahit buriid ekonomalaš rámmaeavttuid oahpponeavvoráhkadeapmái
• joatkit ohcanvuđot doarjjaortnega
• doarjut oahpponeavvuid jorgaleami sámegillii
• álggahit sámegiel oahpponeavvuid kvalitehtaeavttuid ráhkadeami
• vuoruhit visotgokči oahpponeavvuid
• vuoruhit digitála ja deaddiluvvon oahpponeavvuid, ja maiddái oahpponeavvuid mat leat sihke deaddiluvvon ja digitála hámis
• sihkkarastit rámmaeavttuid lágádusaide vai oahpponeavvuid sáhttá doalahit ja ođasmahttit neahtas guhkit go vihtta jagi
• nannet sámegiel oahpponeavvuid gaskkusteami
• joatkit oahpponeavvoguovddáža ođđasisorganiserenproseassa, man ulbmil lea buoridit sámegiel oahpponeavvuid gaskkusteami
• ruhtadit oahpponeavvuid almmolaš háhkamiid bokte
• ovttasbargat oahpponeavvobuvttadeddjiiguin, searvvahit sin áššáigullevaš proseassaide ja jámma čuovvolit prošeavttaid
• doallat jahkásaš ohcciidwebináraid oahpponeavvobuvttadeddjiide
• čuovvolit departemeantta čielggadanbarggu sámi oahpponeavvodili birra
• ásahit rájiidrasttideaddji ovttasbargojoavkku Sámis, man ulbmil lea buvttadit oahpponeavvuid oktasaš sámi historjjá birra

– Dán strategiijaplánas mii leat válljen vuoruhit oahpponeavvuid guovtti jahkái. Dan dahkat go jagi 2027 rájes lea stuora eahpesihkarvuohta dárbbuid dáfus. Departemeantta čielggadeamis oahpponeavvoráhkadeami birra sáhttá leat dadjamuš viidáset vuoruhemiide, ja ovddit jagiid vásáhusat čájehit ahte oahpponeavvodilli lea ollu dan duohken movt prošeavttat ovdánit ja daid bohtosiid duohken, dadjá Nystad Storslett.

Sámediggeráđđi maiddái pláne álggahit sámi parallealla seammaárvosaš oahppoplána ovdánahttima matematihkas.

– Dat mearkkaša ahte oahpaheddjiide šaddet buoret vejolašvuođat doallat heivehuvvon oahpahusa sámi vuolggasajis. Ođđa oahppoplánat mielddisbuktet dárbbu ovdánahttit oahpponeavvuid fágii, loahpaha Nystad Storslett